Ǵalamshardaǵy adamdardyń kópshiligi qoldanatyn bul ádis biraz adamnyń ómirin oırandady.  Zıandy hımıalyq qyshqylmen shabýyl jasaý búgingi kúnde keń qoldanysqa ıe, dep habarlaıdy Qamshy aqparattyq agenttigi.  Mundaı shabýyl saldarynan  adamnyń bet, dene bólikterinde sol qaıǵyly oqıǵanyń izi máńgilikke qalyp qoıyp jatady.

1. Ketı Paıper

2008 jyly ataqty sánbıke Ketı Paıperge kúkirt qyshqylymen shabýyl jasalǵan bolatyn. Alystaǵy ózge bireý emes óziniń 35 jastaǵy Dennı Lınch esimdi jigitiniń áreketi saldarynan kórikti qyzdyń kóz tartar kelbetiniń biraz bóligin kúıik shalady. Kúıik úshinshi dárejeli bolyp, jas qyzdyń qas, sol qulaǵynyń jartysy, murnynyń biraz bóligi kúıip ketedi. Kóz tusy, til jáne óńesh, qol men moıyn tustary zıan shegedi.  Ketı sol kúni aýrýhanaǵa jetkiziledi. Dárigerlerdiń aıtýy boıynsha, olar buryn sońdy mundaı aýyr jaraqatty keziktirmegen.  Sońǵy úsh jylda Ketı ishki aǵzalaryna 80-ge tarta ota jasatqan. Onyń bári tek qana qalypty tamaqtaný úshin ekeni málim bolyp otyr.  Plasıkalyq ota jasaýshylar qoldan kelmes iske umtylyp, sánbıkeniń bet-beınesin qalpyna keltirý úshin birneshe kúrdeli ota jasaǵan. Búginde Ketıdiń sulýlyǵy ózine oralǵan. Al burynǵy ǵashyǵy bolsa brıtanıanyń bir túrmesinde ómir boıyna sottalyp, qamaýda otyr.

 Djessıka Nataro

Italıalyq sánbıke jáne «Mıss Italıa  - 2007» baıqaýynyń aqtyq máresinde baq synaǵan Djessıka Natarondy  zıandy qyshqylmen burynǵy súıiktisi kúıdirgen. Djessıka kezdesip júrgen jigitimen bolashaǵynyń joq ekenin sezip, ara qatynasyn úzbek bolǵan. Jigitiniń mundaı qatigezikke baratynyn oılamaǵany anyq.  Oryn alǵan qaıǵyly jaǵdaıdyń nátıjesinde Djessıkanyń betin kúıik shalyp, kóz jáne denesi zaqymdanǵan.  Búginde boıjetken aýrýyn basatyn dári-dármek  úshin aı saıyn 800 evro jumsap otyr.  Pastıkalyq otany tek bir jyldan soń ǵana jasaýǵa bolady degen derekter de bar.  Jaqyn arada Djessıka  bir telebaǵdarlamanyń qonaǵy bolyp, birinshi ret óziniń betperdesin sheshti.  Óziniń burynǵy qatigez jigitine arnap : «Maǵan ne istegenińdi qara. Bul mahabbat emes» dep aıtqan bolatyn. Soǵan qaraǵanda shabýyl jasaǵan jigit bostandyqta bolýy kerek.

 Dana Výlın

2012 jyly avstralıalyq  Dana Výlın óziniń bir tanysynyń qyzǵanshaq áıeliniń shabýylyna tap bolady. Dana Výlındi kúıeýine qastandyq jasadyǵa balaǵan. Qyzǵanyshtyń saldarynan Dana Výlınge etıl spırtin quıyp, órtep jibergen.  Qaıǵyly jaǵdaıdyń nátıjesinde Danany  úshinshi dárejeli kúıik shalǵan. Biraz ýaqyt komada jatqany belgili bolyp otyr. Avstralıa turǵynynyń aıtýy boıynsha, ol eki jyl boıy arnaıy betperdemen júrgen. Aınanyń janynan ótýge júreksingen.  Onyń basty sebebi, júzime adam qaraıtyndaı bolmaǵandyqtan deıdi.

 Eleonora Kondratúk

Reseı turǵyny Eleonora Kondratúk «Krasa Sochı» jáne «Mıss ocharovanıe» baıqaýlarynyń jeńimpazy.  Eleonora Kondratúk  1999 jyly bir jigittiń betin qaıtarǵan.  Birneshe jyl ótken soń sol jigit Eleonoranyń sońyna  qaıta túsedi. Úıine qaıtyp kele jatqan tusta, artynan jasyrynyp kelip kúkirt qyshqylymen kúıdirgen. Qyshqyl qyzdyń kóz, tynysh joldaryn, bet terisin jáne moıyn men arqa tustaryn kúıdirgen.  Aýyr halde aýrýhanaǵa jetkizilgen Eleonora 300-den astam otany ótkeredi.  Jasalǵan qanshama otanyń áseri bolmaǵan.  Búginde burynǵy sánbıke ózi sıaqty kúıikten zıan shekken ortada jıi kórinýde.

Laksmı Saa

Úndi qyzy Laksmı Saa usynysyn qabyl almaǵan jigittiń shabýylyna tap bolady. Ókpe-renishke toly ǵashyq jigit Laksmıdiń júrek tusyn zıandy qyshqylmen kúıdiredi. Ol kezde Laksmıdiń jasy nebári 15-te bolatyn.  Kúıik shalǵanyna qaramastan sán áleminde óz baǵyn synap, quqyǵyn qorǵaı bilgen.  Sulýlyǵyna syzat salynǵanyna qaramastan,  bıyl Laksmı Viva N Diva markaly kıim kórsetiliminiń basty beınesi atandy.

 Reshma Kýshera

Reshma Kýshera- 18 jasynda qyshqyldan  japa shekken Úndi qyzy. Óziniń týǵan aǵasynyń is-áreketiniń qurbany bolǵan. Reshma kúıikten aýyr jaraqat alyp, kózinen aıyrylǵan. Soǵan qaramastan túrli vıdeolardy áleýmettik jelilerge júkteýde. Shabýylǵa tap bolǵan qurbandar múgedek bolyp qalmaıdy, olardyń da ómirmen kúresýge qaqysy bar deıdi , Reshma.  Búginde túrli sán kórsetilimderine qatysyp, Úndistandaǵy qurbandarǵa degen kózqarasty ózgertkisi keletinin málimdedi.

Shırın Mohomadı

Shırın Mohamadı kúıeý jigitiniń shabýylyna ushyraǵan kezde 18 jasta bolǵan. Jas boıjetken qyshqyl saldarynan oń kózi men qulaǵynan aıyrylǵan. Aýyz bóligi zaqymdanyp, denesiniń biraz bóligin kúıik shalǵan. Búginde Shırın birneshe kúrdeli otanyń basynan ótkergen. Desek te, burynǵy qalpyna kele qoıǵan joq.

Daıyndaǵan: Aıgerim Taýbaı