Búgin Almaty oblysynyń ákimi Amandyq Batalov Uly Otan soǵysynyń ardageri, Elbasynyń ustazy, ardaqty aqsaqal Seıithan Isaevty 100 jasqa tolýymen jáne Uly Jeńis merekesimen quttyqtady dep habarlaıdy Qamshy aqparattyq agenttigi Almaty oblysy ákiminiń baspasóz qyzmetine silteme jasap.

Oblys ákimi A. Batalov aqsaqalǵa Memleket basshysy Nursultan Ábishuly Nazarbaevtyń quttyqtaý hatyn oqyp, tabystady. Prezıdenttiń hatynda: «Qurmetti Seıithan aǵa! 100 jasaǵan torqaly toıyńyz qutty bolsyn! Bir ǵasyr ómir súrý ekiniń birine buıyra bermeıtin bıik shyń. Sonyń basyna shyǵý jolynda Sizdiń ǵumyryńyz túrli qıyndyqtar men qýanyshtarǵa toly boldy. Uly Otan soǵysyna qatysyp, el qorǵadyńyz. Ondaǵan jyldar boıy mektepte ustaz bolyp, eńbek etip, myńdaǵan shákirtterdiń júregine bilim nárin quıdyńyz. Solardyń qatarynda ózimniń de bolǵanymdy árdaıym rızashylyqpen eske alyp, aıtyp júremin. Eń bastysy, Siz el táýelsizdiginiń kýási bolyp, abyz aqsaqalymyzdyń biri retinde Otanymyzdyń kórkeıip, nyǵaıýyna óz úlesińizdi qostyńyz. Aýyrmaı aman-esen bolyp, budan bylaı da ómirdiń qýanyshy men qyzyǵyna bólene berińiz», - delingen.  Munan soń oblys basshysy aqsaqalǵa syı-qurmet kórsetip, ıyǵyna aq shapan japty.

Seıithan Ahmetuly óz kezeginde Memleket basshysynyń salıqaly saıasatymen aǵa urpaqqa kórsetilip otyrǵan syı-qurmet pen qamqorlyq úshin rızashylyǵyn bildirdi. Osyndaı qoldaý sharalarynyń arqasynda ardagerler eńsesin tik ustap, ómirlik tájirıbelerimen bólisip keledi. «Men árqashan elimizdiń, onyń ishinde oblysymyzdyń damý baǵytyn baǵamdap otyramyn. Atqarylyp jatqan ıgi isterge árqashan tilekshimin. Aldaǵy ýaqytta da elimizge tynyshtyq, ósý men órkendeý tileımin», - dedi abyz aqsaqal.