Kópultty Qazaqstannyń negizgi baılyǵyn sútteı uıyǵan júzden astam ult ókilderi quraıdy. Sonyń ishinde slaván halyqtarymen ózara úndestigimiz ben dostyǵymyzdyń tarıhy tereńde. Sondyqtan da ǵasyrlar boıǵy jarasymdy tirlik pen tutastyqtyń jarqyn kórinisin pash etetin «Slaván jazbalary men mádenıeti» kúnderin atap ótý elimizde dástúrli sharaǵa aınalǵan. Kúntizbede belgilenbegen tatýlyq merekesi búgin Astana qalasynda atalyp ótti. Aýqymdy shara aıasynda «Túrki-slaván baılanysyndaǵy til jáne ádebıet: qazirgi zaman kózqarasy» atty halyqaralyq ǵylymı konferensıa uıymdastyryldy dep habarlaıdy Qamshy aqparattyq agenttigi tilalemi.kz aqparatyna súıenip. 

Konferensıaǵa Qazaqstan Respýblıkasyndaǵy slaván jáne túrki memleketteri elshilikteriniń ókilderi, ǵalymdar men qoǵam qaıratkerleri, etnomádenı birlestikter men etnoaǵartýshylyq mektepterdiń qyzmetkerleri qatysty. Basqosý barysynda Qazaqstan etnomádenı keńistigindegi slaván tilderiniń alýan qyrly qyzmeti men olardy saqtap qalý máseleleri sóz boldy. Orys jáne ózge de slaván tilderin oqytý baǵytynda jınaqtalǵan tájirıbeler tarazylanyp, slaván jáne túrki tilderindegi uqsastyqtar men erekshelikter ekshelendi.

Túrki jáne slaván halyqtary arasyndaǵy rýhanı jáne mádenı saladaǵy qarym-qatynasty odan ári nyǵaıtýǵa baǵyttalǵan alqaly jıynda slavántaný, túrkitaný, tildik qatynas, aýdarmataný, ádebıettaný salasynyń ǵalymdary baıandama jasady.

Taısıa Marmontova, QR Prezıdenti janyndaǵy «Qoǵamdyq kelisim» RMK etnıkalyq qatynastar salasynda taldaý jáne monıtorıń qyzmetiniń basshysy, tarıh ǵylymdarynyń kandıdaty:

- Eki memlekettiń kórshilik syılastyǵy eki el arasyndaǵy beıbitshilikti ǵana kórsetip qoımaıdy, sonymen qatar barsha túrki jáne slaván halyqtary dostyǵynyń álemdik irgetasy bolyp sanalady. Reseı jáne Qazaqstan Eýrazıa odaǵynyń biryńǵaı damý polúsi dese de bolady. Olardyń birlesken is-qımylynsyz Eýrazıa keńistiginde beıbitshilik pen kelisimge qol jetkizý áste múmkin emes. Bul eki el, Reseı men Qazaqstan, biri-birinsiz ómir súre almaıtyn egizder sekildi der edim.

Túrkiler men slavándar birlesip úlken damyǵan birtutas keńistik qurdy. Sol keńistikte tarıhy, mádenıeti, rýhanı jaqyn adamdar turady. Slaván jáne túrki álemi búginde 500 mln. adamdy quraıdy. Bul degenimiz álemdik qurylyqtyń besten bir bólshegi. Endeshe úlken kúsh emes pe?. Quramynda Reseı, Belorýs, Qazaqstan, Qyrǵyzstan memleketteri bar Eýrazıalyq odaq shyn máninde slaván jáne túrki álemi ǵoı. Búgingi Slaván jazbalary men mádenıeti kúni merekesinde ótip jatqan konferensıa eki halyqtyń arasyndaǵy uly dostyqtyń sıpaty dep esepteımin.

Arǵynǵazınov Aıbol, Reseı (Keńes) joǵary oqý oryndary túlekteriniń Qazaqstandyq qaýymdastyǵynyń Prezıdenti:

- Ár jyldyń mamyr aıy bizder úshin qadirli mereke - Túrki jazýy kúni men Slaván jazýy men mádenıetiniń kúnderi atalyp ótedi. Túrki tektes memleket retinde tarıhymyzdy ulaǵattap, bolashaqqa baǵdar qurǵan ǵasyrǵa jýyq merzimde kırıll jazýyn qoldanyp kele jatqan bizdiń memleketimiz úshin búgingi kúnniń mańyzy erekshe. Bul mereke halyqtardy jaqyndastyryp, ortaq qundylyqtarǵa biriktirip, «Máńgilik el» ulttyq ıdeıasyn júzege asyrýǵa barshamyzdy jumyldyratyny anyq. Orys tili elimizde ultaralyq qatynas tili retinde qodanylyp kele jatqandyǵy eki kontınentti bir-birine jaqyndastyrdy. Endigi kezekte qazaqstandyq jas urpaqtyń basty mindeti ultaralyq qarym-qatynasty nyǵaıtý bolmaq.

Shara M.Gorkıı atyndaǵy Memlekettik akademıalyq orys drama teatrynda merekelik konsertpen jalǵasty.