Búgin qazaqtyń atyn álemge áıgili etken Dımash Qudaıbergenniń týǵan kúni. Búgin Dımash  23 jasqa toldy. Ony álemniń túkpir-túkpirindegi jankúıerleri quttyqtap jatyr dep habarlaıdy Qamshy aqparattyq agenttigi.

Eń aldymen baýyr eti balasyn ata-anasy quttyqtady. 

«Dımash, sen ómirge kelgen mamyrajaı mamyrdyń shýaqty kúni, ata-anamnyń «uldy boldyq!» dep shattanyp, ulan-asyr toı jasaǵany, qýanysh ústinde «Balapanym! 
Ata-anamnyń áldıisiń!
Alyp ushqan kóńilimniń án-kúıisiń!
Shat kúlkimen ómirge adym basa ǵoı!
Baqytyńnyń shektelmesin mólsheri, júregimniń kip-kishkentaı bólshegi!» dep án arnaǵanym - kúni keshegideı kóz aldymda...
Bárimizdiń mahabbatymyzǵa bólenip óstiń. Ásirese papamyz ben mamamyzdyń ózińe degen sezimi erekshe bolatyn! Áli kúnge solaı - tóbeńnen qus ushyrmaıdy! Mamamyz basyńnan sıpap otyryp «meniń qulynym boıy uzyn, oıy bıik, armany asqaq, júregi jumsaq, meıirimdi azamat bolyp ósedi» dep aınalyp, tolǵanýshy edi. 
Sen aqyldy azamat bop erjettiń. 
Ómir - buralańdy soqpaqtardan, dańǵyl joldardan, jabysqaq batpaqtardan, móldir aıdyndardan turatyn kúrdeli álem.  Ár adam ómirge óz terezesinen qaraıdy. Bireýdiń terezesi kirshiksiz taza - ol álemniń bárin ádemi etip kóredi, al bir adamdar aınalaǵa jýylmaǵan kir terezesinen qaraıdy...
Ómirde qandaı adamdy keziktirseń de boıynan jaqsylyq izdeýge tyrys, qýanysh syılaýǵa tyrys! Terezelerdiń tazarýyna kómektes... Búgin týǵan kúniń! Otbasymyz úshin qýanyshty kún. Ómiriń mándi de sándi, ǵumyryń uzaq, baqytty bolsyn, Dıkonym! Aǵataıyń.», dep ákesi Qanat Aıtbaev quttyqtady.

Dımashtyń anasy Sveta Aıtbaeva Instagram jelisinde  «Dıkontaıym! Týǵan kúniń qutty bolsyn! Eń bastysy, aman júr, ǵumyrly bol! Bizdiń otbasymyzdy, aǵaıyndy, dos-jarandy ǵana qýantyp dúnıege kelip ediń , shúkir,búginde dúıim jurtty , búkil eldi qýantyp júrsiń . Osy betińnen taıma! Biz úshin,artyńnan ergen qos baýyryń úshin seniń ornyń erekshe.Biz seni jaqsy kóremiz! Armanshyl balapan , barlyq armandaryń oryndalsyn!», dep aq tilegin joldady.

Dımashty álemge áıgili óner adamdary da quttyqtap, aq tilekterin vıdeo arqyly jetkizip jatyr. 

Onyń ishinde Dımashtyń ónerine tánti bolyp, talantyn moıyndaǵan áıgili ánshi Lara Fabıan da bar. Ánshi tileginiń sońyn «Happy birthday to you» ánimen aıaqtady.

Sonymen birge amerıkalyq model Eva Longorıa áleýmettik jeli arqyly Dımashqa  aq tilegin bildirgen.

Eńbektegen sábıden, eńkeıgen qartqa deıin Dımashty quttyqtap, aq tilekterin bildirgen jankúıerleri Dımashtyń 23 jasqa tolýyna oraı 23 eldiń ókilderi quttyqtaý joldaǵan vıdeosy jarıalandy.

13 jastaǵy kanadalyq qyz Dımashtyń sýretin salyp,  qazaq tilinde quttyqtaý tilegin bildirgen.

«Sen bizge ańsaǵan arman ánderin syıladyń, biz saǵan umytylmas eles syıladyq. Biz 960 shaqyrym alys óńirdiń tórt buryshynan kelip otyrmyz. Biz qaınaǵan qaladan, sonaý  alys jerdegi qystaqtan keldik. Biraq saǵan jolyqqan barlyq ótken kúnder umytylmas eles bolyp, máńgi esimizde  saqtalady. «Umytylmas eles» áni Dımashqa arnalady, sen bizge qazaq eliniń romantıkalyq ómirin sezimdirdiń, biz saǵan qytaı eliniń romantıkasyn sezindire alsaq deımiz» dep júrek jardy tilekterin bildirdi Dımashtyń tyńdarmandary.

Taǵyda aıta ketetini tanymal ánshi Dımashtyń  týǵan kúnine oraı, búgin túngi 00:00-ge deıin Astananyń barlyq LED ekrandarynda tek qana Dımash týraly beınerolıkter kórsetiledi.

«Sheteldik fanattarǵa Astanadaǵy eń kórnekti LED ekrandarmen kelisim jasaýǵa qol ushyn sozdym. LED ekrandardy bir kúnge jalǵa alýǵa bir mıllıon teńgeden astam qarajat jumsaldy, shyǵynnyń barlyǵyn Dımashtyń ónerin erekshe baǵalaıtyn qytaılyq «Guardians of Dimash» fanattar toby ótedi», - deıdi EUÝ-dyń stýdenti Aqedil Nurbolatuly.

Daıyndaǵan: Aqnur MUHTARHAN