Álemde balaly bola almaı júrgender óte kóp. Biri balaǵa zar bolsa, endi biri baýyr eti balasyn dalaǵa tastap júr. Sábıli bolsam dep jatsa da, tursa da armandaıtyndardyń biri argentınalyq Klaýdıo Kokkalon men Marıela Rjepeskı. Ol armanyna jetý úshin aýrýhana tabaldyryǵyn tozdyrdy. Jasandy uryqtandyrýǵa da júgingisi keldi. Alaıda ol nusqa da óz nátıjesin bermedi.Osydan keıin úmiti úzilip, taýy shaǵylǵan Marıela uzaq ýaqyt kúızeliste boldy. Áıeliniń kúnnen-kúnge sónip bara jatqanyn kórgen Klaýdıo bala asyrap alýdy usyndy. Osydan keıin otbasylyq juptyń úıinde qaıta qýanysh ushqyndary paıda boldy.

Alaıda bala asyrap alý prosesi uzaqqa sozyldy. On jyldan keıin bala asyrap alýǵa ruqsat etildi degen jaýap kelgen. Otbasylyq jup jetimder úıine kelgende 12 jastaǵy Hýlıo esimdi balaǵa birden baýyr basyp, jyly tartady.

Hýlıonyń tórt inisi men qaryndastary bar eken. Hýlıo olarǵa jıi baryp turdy. Olar da qonaqqa kelip turǵan.

Bir kúni onyń inisin úlken balalar soqqyǵa jyǵyp, aýrýhanaǵa túskenin estigen Hýlıo ózin qoıarǵa jer tappady. Kúni boıy jaqyndarynyń qasynda bolyp, túnde amalsyzdan úıge qaıtatyn. Hýlıonyń muńaıǵan kózinen onyń ini, qaryndastarynan jyraqta ómir súre almaıtynyn túsingen Marıela men Klaýdıo onyń ini, qaryndastaryn da asyrap alýǵa bel býady. Bul jańalyqty estigende Hýlıo qýanyshtan jylap jibergen.  

Qazir olar tatý-tátti ómir súrip jatyr. Marıela men Klaýdıonyń bes balasy bar. Olar úılerine qýanysh, baqyt kelgenin jáne buryn únemi qańyrap bos turatyn, tynyshtyq ornaǵan úıleri balanyń kúlkisi men mahabbatqa tolǵanyn aıtady.

Marıelanyń úı sharýasyna qolǵabys etetin kómekshileri paıda bolǵan, al jigitter ákesine kómektesip, aırandaı uıyǵan otbasyna aınalǵan. 

Marıelan men Klaýdıo jasandy túsik jasaıtyn jáne týǵan balasyn tastap ketetinder eshqashan baqytty bolmaıtynyn aıtady. Sebebi dúnıege kelgen beıkúná sábıdiń kóz jasy aldynan shyǵatynyn jetkizedi. 

Daıyndaǵan: Ásem Álmuhanbet