Reseıdiń Túmen oblysy Tobol aýdandyq soty «Fılıpp Lıs» degen atpen tanymal 22 jastaǵy Fılıpp Býdeıkındi úsh jylǵa jalpy qonystaný mekemesine jiberý jóninde sheshim shyǵardy. Ony adamdardyń sýısıd jasaýyna ákeldi dep aıyptaıdy, dep habarlaıdy Qamshy.kz aqparat agenttigi centralasian.org-ke silteme jasap.

«Sot prosesi kezinde sottalýshyǵa taǵylǵan aıyptar dáleldendi», – deıdi sýdıanyń kómekshisi Elvıra Iakýbova.

Sottyń baspasóz qyzmetiniń habarlaýynsha, Fılıpp Býdeıkın kinásin tolyq moıyndaǵan, istegen isterine ókinish bildirgen. Tergeý isi boıynsha aıyptalýshy 2016 jyldyń sáýir, mamyr aıynda «kámeletke jasqa tolmaǵandar arasynda sýısıdti nasıhattaǵan».

Tergeýshiler sotta eki epızodty baıandaǵan: Býdeıkın Astrahan qalasynyń 16 jastaǵy turǵynyn ózine qol jumsaýǵa úgittegen. Biraq arnaıy qyzmet arasha túsken. Sonymen birge «Fılıpp Lıs» 17 jastaǵy qyzdyń sýısıdke barýyna sebepshi bolǵan. Qyzdy dárigerler qutqaryp qalǵan.

2016 jyldyń mamyr aıynda «Novaıa gazeta» basylymy «Ólim toby» degen maqala jarıalady. Onda «Vkontakte» jelisinde jasóspirimderdi sýısıd jasaýǵa májbúrleıtin top bar ekendigi aıtylǵan. Jabyq topqa 130 oqýshy múshe bolǵan. Keıin áleýmettik jelilerdegi qaýipti oıyn jaıynda álemdik BAQ habarlaı bastady.