Atalǵan shara Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda ótti. Kórme otandyq taýar óndirýshiler men tutynýshylar arasynda ashyq dıalog  alańyn usynyp, ónim básekege qabiletti bolý úshin sapasyn arttyrý jáne naryqtaǵy nasıhatyn jaqsartý, shet elge shyǵarý joldaryn tabý sekildi taqyryptardy talqylaýdy maqsat tutady dep habarlaıdy Qamshy.kz aqparat agenttigi.

Forým jumysyna QR Premer-mınıstri Baqytjan Saǵyntaev, «Báıterek» UBH AQ Basqarma tóraǵasy Erbolat Dosaev, «Damý» Kásipkerlikti damytý qory» AQ Basqarma tóraǵasy Abaı Sarqulov, «Atameken» UKP Tóraǵasy Abylaı Myrzahmetov, qazaqstandyq kásipkerler, sarapshylar, saýda jelileri ókilderi jáne basqa da kóptegen tulǵalar qatysady.

«Damý» qory uıymdastyrǵan «Qazaqstanda jasalǵan» atty otandyq taýar óndirýshilerdiń İİİ respýblıkalyq kórmesi qordan qoldaý alǵan 350-den astam kásiporynnyń basyn qosqan.  Olardyń arasynda tamaq ónerkásibi, qurylys salasy, jıhaz shyǵarý, kıim-keshek, arnaıy tehnıka men qural-jabdyqtar, zergerlik buıym, káde syı men polıgrafıalyq ónim shyǵarýshy kásiporyndar bar. Kórme 28 shilde men 30 shilde aralyǵynda 3 kúnge sozylady.  Bul kúnderi kórme qonaqtary otandyq óndirýshilerdiń taýarlaryn alyp, qyzmet túrlerimen tanysyp, sheberlik sabaqtaryna qatasyp, tamaqtarynan dám tata alady. Kúndelikti tańerteńnen 16:00-ge deıin qundy syılyqtar oınatylady. Shara aıasynda «Qazaqstannyń úzdik taýary» atty respýblıkalyq baıqaý-kórmesi de ótedi.