Ortalyq komýnıkasıalar qyzmetinde QR Din isteri jáne azamattyq qoǵam mınıstri Nurlan ERMEKBAEVTYŃ qatysýymen «Ýaqyp» korporatıvtik qaıyrymdylyq qorynyń qurylýy týraly» taqyrybynda brıfıń ótti dep habarlaıdy Qamshy.kz aqparat agenttigi. Brıfıń jumysyna Qazaqstan dinı musylmandar basqarmasynyń naıb-mýftıi Naýryzbaı ÓTPENOV jáne «Ýaqyp» korporatıvtik qaıyrymdylyq qorynyń prezıdenti Qaırat AITBAI qatysty.

2017 jylǵy mamyrda «Ýaqyp» korporatıvtik qaıyrymdylyq qory quryldy. «Ýaqyp» qorynyń qyzmeti komersıalyq emes qaıyrymdylyq uıym retinde áleýmettik jobalardy qarjylandyrýǵa, bilim-aǵartýshylyq sharalardy júrgizýge, sonymen qatar, dinı birlestik qyzmetkerlerleri jumysynyń tıimdiligin kóterý jáne dinı mekemelerdiń qyzmetin qoldaýǵa baǵyttalady.

Qordyń quryltaıshylary QR Din isteri jáne azamattyq qoǵam mınıstrliginiń Halyqaralyq dinder jáne mádenıetter ortalyǵy jáne Din máseleleri jóninde taldaý jáne ǵylymı-zertteý ortalyǵy bolyp tabylady.

Qor qyzmetiniń ashyqtyǵyn jáne qarjynyń maqsatty jumsalýyn qamatamasyz etetin Qamqorshylyq keńesi quryldy. Onyń quramyna QR Parlamentiniń depýtaty, Joǵarǵy mýftıı, «Dintanýshylar kongresiniń» tóraǵasy, Qarjy mınıstrliginiń, Memlekettik qyzmet isteri jáne sybaılas jemqorlyqqa qarsy is-qımyl agenttiginiń, «Atameken» kásipkerler palatasynyń, «Astana» halyqaralyq qarjy ortalyǵynyń ókilderi jáne belgili qoǵam qaıratkerleri endi. Din salasyndaǵy ýákiletti organnyń birinshi basshysy retinde Qamqorshylyq keńestiń tóraǵasy Din isteri jáne azamattyq qoǵam mınıstri bolyp sanalady.

Qordy qurý barysynda birqatar musylman elderiniń, sondaı-aq, Belgıa, Reseı sıaqty elderdiń tájirıbeleri jan-jaqty zertteldi.

Mınıstr Nurlan Ermekbaev «Ýaqyp» qorynyń ózgesheligi qaıyrymdylyq qarajattaryn basqarýmen qatar tabys tabýmen aınalysa alatyndyǵyn atady. Sol sebepti qarjy túrindegi aktıvterimen qatar, jyljıtyn jáne jyljymaıtyn múlikterdi basqarýǵa ruqsat bar. Atalǵan tabystardyń salyqtaryn tólegennen keıin aqshany qaıyrymdylyqqa jumsaýǵa bolady. Al naqty bir maqsatqa arnalǵan kapıtal (endaýment) qomaqty bolsa, onda ol kásibı basqarýshy ınvestısıalyq kompanıa basqarýyna beriledi.

«Ýaqyp» qorynyń prezıdenti Qaırat Aıtbaıdyń aıtýynsha, Qor qaıyrymdylyq, áleýmettik, mádenı, ǵylymı, bilim jáne basqarý maqsattaryna jetýge atsalysyp, alys eldi mekenderdegi bilikti ıamamdardy tartýǵa yqpal etedi.

«Ýaqyp» qorynyń qyzmeti kelesi mindetterdi sheshýge baǵyttalǵan:

• eldegi beıbitshilik pen turaqtylyqty qamtamasyz etýge úles qosý;
• turǵyndardyń áleýmettik az qamtylǵan toby men múmkindigi shekteýli azamattarǵa kómek kórsetý;
• balalar men jastardyń fızıkalyq jáne ıntellektýaldyq damýyn qoldaý;
• dinı radıkalızm men ekstremızmniń aldyn-alý;
• mamandardyń biliktiligin kóterý jáne shalǵaıda ornalasqan dinı birlestikterdiń áleýmettik máselelerin sheshý.

Osy atalǵan mindetterdi sheshýge saýapty is jasaýǵa nıet bildirgen eldiń barlyq azamattary, Qazaqstannyń komersıalyq jáne komersıalyq emes uıymdary, sondaı-aq, sheteldik jáne halyqaralyq uıymdar shaqyrylady.