«Ómir soqpaǵynda qaldyrǵan iziń anyq bolsa, ol seniń óskeniń. Al, iziń eleýsiz bolyp, umytyla bastasa, ol seniń óshkeniń» deıdi dana halqymyz. Ár adamnyń qaldyrǵan izi qoǵamǵa, halqyna sińirgen eńbegimen, eń bastysy, izin jalǵastyrar urpaǵynyń eli quptarlyq oń isterimen ólshener.

Biz de 52 jyldaı qatar órilgen ómirimizde, birimiz halyqqa bilim berý, ekinshimiz memlekettik qyzmet salasynda hal-qaderimizshe eńbek ettik, qazir zeınetkermiz. Eńbegimiz elendi, memlekettik marapattan da quralaqan emespiz. Áıtse de bizdiń úkili úmitimiz ulymyz Esenmen jáne tuńǵysh nemeremiz Darınamen baılanysty bolatyn. 

Esen ulymyz týa salyp, 2 jyldan astam aýrýhanadan shyqpady. Múmkin, dárigerlerdiń kómegi, týystardyń sábıge degen yqylasy, óziniń ómirge degen qulshynysy bolar, densaýlyǵy ońalyp, qurdastarymen taı-qulyndaı tebisip, oınap ketti. Tipti, 19 jasynda óz qalaýy boıynsha úılenýine de qarsy bolǵan joqpyz. 20 jasynda qyzy Darına dúnıege keldi. Ózi tańdap alǵan mamandyǵyna saı 2 joǵary oqý ornyn bitirip, atqaryp júrgen qyzmetiniń qyr-syryn tereń túsinip, qyzmet satysy da óse bastaǵan bolatyn.

Al, Darına-Dakolányń ómirge kelýi bizdiń shańyraǵymyzdy erekshe qýanyshqa bóledi. Týmysynan zerek, alǵyr Dakolá ózdiginen árip tanyp, synyp attap, 14 jasynda 9-shy synypty úzdik bitirdi. Qazaq, orys, aǵylshyn tilderinde óleń, referattar jazýshy edi. Sonymen birgetsýret salý, bı ónerinde talanty erekshe boldy. Qyzymyz dúnıeden ozǵan soń jaryq kórgen «Asqaǵym – Astanam» (shyǵarmalar toptamasy), «Kóńil kózi» (sýretter katalogy) respýblıka kitaphanalaryna jiberilgen bolatyn. Qazir oqýshylardyń ótinishine saı, atalǵan týyndylardyń ekinshi, tolyqtyrylǵan nusqasy jaryq kórdi. Darına Esenqyzy Áýjantegi «Han táńiri qyrandary – ulylardyń urpaqtarymyz» atty ensıklopedıalyq jınaqqa kirip, kóptegen aqyn-jazýshylar Darınanyń eńbekterine silteme jasaı bastady. Ókinishke oraı, 2007 jyldyń 3-shi tamazynda bolǵan kólik apatynan ulymyz Esen, súıikti nemeremiz Darına qaıtys boldy. Endi Názgúl Bektursynqyzy ekeýmizdiń ómirimiz – Esen men Darına qasymyzda bolǵan baqytty jyldar men qos qulyndarymyzdan aıyrylyp, keń dúnıe aıaqasty tarylǵan jyldardan turatyndaı.

Sirá, halqymyz «Adam úsh kúnnen keıin kórge de úırenedi» degen sózdi beker aıtpaǵan bolar. Biz de sendersiz 10 jyldyń ishinde qıal men saǵynysh kemerinen asqan vırtýaldy ómir súrýge beıimdelgendeımiz. Osy jyldar ishinde ekeýińniń bıik rýhtaryna baǵyshtalǵan «Qos juldyz. Dve zvezdy»,  «Taǵdyrdyń toqsan túıini», «Zerde jańǵyryǵy. Skvoz prızmý vremenı», «Tegine tartqan túlekter. Stranısy památı» atty eńbekterimiz jaryq kórdi. Tek sóıtip qana senderge degen saǵynyshymyzdy azdap bolsa da basqandaımyz.

Endigi bizdiń úmitimiz, sol kólik apatynda Darına ápkesi óz denesimen qorǵap qalǵan, kenje nemeremiz Dımataıda. Dımash tamyzdyń 31-i kúni 13-ke keledi. Darına oqyǵan mektep-lıseıdiń 6-shy synybyn Maqtaý gramotasymen bitirdi. Jazǵan referattary Anglıada, Chehıada, Polshada shyqty. Oqýshylardyń matematıka páni boıynsha  Bolgarıada ótken halyqaralyq baıqaýynda birinshi oryndy jeńip aldy. «Baldáýren» atty sýretter katalogy jáne «Kókbóri – dala taǵysy» atty áńgimeler jınaǵy jaryq kórdi. Bul da bolsa bizdiń qyryq jamaý kóńilimizge demeý ǵoı. Uly Abaı da «Adamnyń bir qyzyǵy bala degen...», ‒ dep dúnıeden erte ozǵan Ábishi (Ábdrahman) esine túskende jazǵan bolar...

Biz de, mine, balalarymyzdyń fánı dúnıeden ozǵanyna 10 jyl bolýy qarsańynda eske alyp otyrmyz.

Esen qulynym, Darına balapanym, sender bizdiń máńgi júregimizdesińder!

                                                                                                    Ákeń, atań Bolat Áýjanuly

                                                                                        Anań, apań Názgúl Bektursynqyzy