Qazaqstannyń kıeli jerleriniń geografıasy boıynsha 600 nysan belgilendi. Bul týraly búgin Prezıdent janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komısıanyń úshinshi otyrysynda QR Prezıdenti Ákimshiliginiń basshysy - Ulttyq komısıanyń tóraǵasy Ádilbek Jaqsybekov málim etti, dep habarlaıdy Qamshy.kz aqparat agenttigi.
"Sońǵy tórt aıda Elbasy usynǵan baǵdarlamany júzege asyrýda naqty qadamdar jasaldy. Ortalyq jáne jergilikti memlekettik organdar bul baǵyttaǵy jumysqa belsendi qatysyp jatyr, sondaı-aq oblystarda arnaıy komısıalar, jobalyq keńseler, sarapshylyq toptar quryldy. Ortalyq jobalyq keńseniń jumysymen jańa tanysyp shyqtyq. Ózderińiz kórdińizder, kóp jumys jasalǵan. Ulttyq komısıanyń arnaıy toptary jumysynyń alǵashqy nátıjeleri bar. Biz osy sharalardy uıymdastyrýda jańa deńgeıge shyqtyq», - dep atap ótti Á. Jaqsybekov. Taratylǵan málimetterge qaraǵanda, jobalyq keńse jumysyn bastaǵannan beri mınıstrlikter men ákimdikter usynǵan 1170 jobany pysyqtady. «Sonymen búginde jańa álipbıdiń jobasy jasaldy. Qazaqstannyń kıeli jerleriniń geografıasy boıynsha 600 nysan belgilendi. Olardyń 22-sinde ǵylymı-restavrasıalyq jumystar bastaldy. Týǵan jer baǵdarlamasy boıynsha keń kólemde jumystar júrgizilip jatyr. Mádenıet baǵytynda eń úzdik shyǵarmalar tańdap alyndy», - dedi ol. Sonymen qatar Á. Jaqsybekov «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda gýmanıtarlyq pánder boıynsha 17 oqýlyqtyń tizimi jasalǵanyn jáne olarǵa aýdarma jasaý sharalary bastalǵanyn atap ótti. «Bul osy jumystyń basy ǵana. Barlyq baǵyttar boıynsha josparly maqsattar bar. Ony qoǵam qoldap otyr. Keleshekte úlken jumystar atqarylady. Elbasynyń «Rýhanı jańǵyrý» baǵdarlamasy jalpyulttyq jobaǵa aınalýy kerek»,-dep túıindedi sózin ol. Belgili bolǵandaı, «Jahandaǵy zamanaýı qazaqstandyq mádenıet» jobasy boıynsha úzdik týyndylardyń tizimi jasaldy. Oǵan ádebıet salasyndaǵy 216, «teatr, kıno jáne horeografıa» janryndaǵy 48, beıneleý óneri boıynsha 182 jáne mýzyka salasyndaǵy 200-den astam shyǵarma endi. Budan bólek, «Qazaqstandaǵy 100 jańa esim» jobasyna 1500 ótinim kelip tústi, olardy ary qaraı ashyq daýys berýge usynylatyn aralyq pýldar bolady.
