12 qyrkúıek kúni Astana ýaqytymen 01 saǵat 23 mınýtta «Baıqońyr» ǵarysh aılaǵynan «Amazonas-5» telekomýnıkasıalyq spýtnıgi bar «Proton-M» zymyran tasyǵyshy ushyryldy. Ǵarysh aılaǵynyń shuǵyl qyzmetteri men Qazaqstannyń jerústi arnaıy qyzmetteriniń málimeti boıynsha, ushyrylym shtattyq rejimde ótti, dep habarlaıdy Qamshy.kz aqparat agenttigi QazAqparatqa silteme jasaı otyryp.

Zymyran tasyǵyshynan ajyraıtyn bólshekter belgilengen aýmaqqa qulady, 528-inshi sekýndta «Proton»-nan úshinshi saty shtatty túrde ajyrady. Ol «Amazonas-5» telekomýnıkasıalyq spýtnıgi bar «Brız-M údetkish blogyn tirekti orbıtaǵa shyǵardy. Ushý sıklogrammasyna sáıkes, ǵarysh apparatynyń geoótpeli orbıtaǵa shyǵarylýyn odan ári údetkish blok jalǵastyrady. «Amazonas-5»-tiń maqsatty orbıtaǵa shyǵýy 9 saǵat 12 mınýtty quraıdy. Ol dittegen jerine 12 qyrkúıek kúni Astana ýaqytymen saǵat 10.35-te jetýi tıis. Budan keıin telekomýnıkasıalyq spýtnık basqarý úshin tapsyrys berýshi - ıspanıalyq Hispasat kompanıasyna beriledi.