Ulttyq ekonomıka mınıstri Tımýr Súleımenov jańa Salyq kodeksi aıasynda salyq salý ıdeologıasy ózgergenin, ol adal salyq tóleýshini qorǵaýǵa, ekonomıkanyń túrli sektorlaryn yntalandyrýǵa jáne ákimshiliktendirýdi jeńildetýge baǵyttalatynyn baıandady.

Jańa kodekske sáıkes barlyq túsiniksizdikter men dálsizdikter salyq tóleýshiniń paıdasyna túsindiriledi. Bul qaǵıda salyq daýlaryn ádil qaraýǵa múmkindik beredi. Sondaı-aq, eger salyq tóleýshi salyq organynyń túsindirýine sáıkes áreket etse, jáne nátıjesinde pozısıa ózgergen bolsa, aıyppuldar men ósimpuldar qoldanbaý usynylýda. Budan ózge, bızneske zańnamanyń ózgeristerin zertteý úshin kóbirek ýaqyt usynylady. Barlyq paıda bolǵan túzetýlerdi kelise otyryp, bir zań jobasymen engizý usynylýda – bul bızneske salyq kodeksiniń barlyq ózgeristeri týraly habardar bolýǵa múmkindik beredi.

Shaǵyn jáne orta bıznesti damytý úshin qoldanystaǵy arnaıy salyq rejımderin saqtaý qarastyrylǵan. Oǵan qosa, jańa balamaly rejım – tıanaqtalǵan shegerý usynylǵan. Bul aınalymdary úlken, biraq tabysy tómender úshin tıimdi. Kompanıa óz túsiminiń jartysyn rastaýsyz shegere alady, al eger shyǵyndardyń esebin júrgizse, shyǵyndardy rastaǵany úshin syıaqylar (shegerister) alady.

Sondaı-aq, «jeńildetilgen deklarasıa» rejımi aıasynda tabys mólsheri boıynsha talap jeke jáne zańdy tulǵalar úshin birdeı bolady. Budan ózge, patentte mólsherleme 2%-dan 1% deıin tómendetiledi – bul MÁMS jarnalaryn engizýge baılanysty salyq júktemesin azaıtý úshin jasalady.

Jer qoınaýyn paıdalaný salasynda geologıalyq barlaýǵa ınvestısıalar yntalandyrylady. Taý-ken salasy úshin ústeme paıdaǵa salyqty alyp tastaý usynyldy. Tabysty barlaýdy yntalandyrý maqsatynda komersıalyq tabý bonýsyn alyp tastaý josparlanǵan. Teńiz jáne tereń munaı ken oryndary úshin jer qoınaýyn paıdalanýǵa áldeqaıda jeńil balamaly salyq usynyldy.

Ekonomıkanyń naqty sektory turǵysynda arnaıy ınvestısıalyq kelisim (AIK) aıasynda avtomobıl jasaý úshin QQS boıynsha jeńildikter usynylýda. Osylaısha, tolymdaýshylar (shıkizattar men materıaldar) ımporty, sondaı-aq AIK-te óndirilgen taýarlardy ótkizý boıynsha aınalym QQS-dan bosatylady. Sondaı-aq, beriletin múlik    QQS-syz satyp alynǵan bolsa jáne AIK arnalǵan taýarlar tizilimine engizilgen bolsa, múlikti qarjy lızıńine berý QQS-dan bosatylady.

Sonymen qatar, qarjy sektoryn saýyqtyrý, ınvestısıalar tartý jáne arnaıy ekonomıkalyq aımaqtarǵa qatysýshylarǵa jeńildikterdi arttyrý úshin birqatar yntalandyrý sharalary qarastyrylǵan. Atap aıtqanda, «ITP» AEA qatysýshylary úshin eksaýmaqtylyq rejımin 2028 jylǵa deıingi merzimge uzartý jáne jalpy shyǵyndarǵa eńbekaqy shyǵyndary qatynasynda áleýmettik salyqqa jeńildik boıynsha sharttardy bekitý usynylýda.  

Jalpy salyq jańashyldyqtaryn qabyldaǵan soń salyq daýlary, tekserister sany azaıady, ákimshiliktendirý jeńildetiledi dep kútilýde. Salyq saıasaty áldeqaıda aıqyn jáne boljamdy bolmaq.