Elbasyǵa uqsaıtyn astana turǵyny Baýyrjan Toqpanovtyń otbasy dalada qalýy múmkin, dep habarlaıdy Qamshy.kz aqparat agenttigi Baq.kz-ke silteme jasap.

57 jastaǵy Baýyrjan Toqpanov Astanada 1996 jyldan beri turady. Endi ol 14 jyldan beri turǵan páterinen aıyrylýy múmkin.

«Meni kórgenderdiń barlyǵy prezıdentke uqsaıtynymdy aıtyp, onyń syńary dep sýretke túsip jatady. Kópshiliktiń kózine únemi túsetinmin. Alaıda dál qazir jaǵdaıym qıyn kezde meni eshkim estimeı otyr», - dep kúrsinedi Baýyrjan.

Onyń aıtyp otyrǵan ádiletsizdigi, 2003 jyly otbasymen birge kóship kelgen Astanadaǵy Kúıshi Dına kóshesindegi páterinen shyǵarylýy.

«Ózimniń jalǵyz baspanamdy satyp, 2003 jyldyń mamyr aıynda 25 myń dollarǵa «Akmolasvázstroı» AQ úleskerlik qurylys kompanıasynan páter satyp aldyq. Aqshasyn tólep, qujattardy rásimdep, jańa úıge kirdik. Bul bizdiń jalǵyz páterimiz. Endi 14 jyl ótkende bizdi páterimizden shyǵaryp jatyr. 2003 jyly jasalǵan kelisimshart jaramsyz dep tanyldy», - deıdi ol.

Onyń aıtýynsha, 2011 jyly «Akmolasvázstroı» kompanıasynyń burynǵy jáne jańa basshylyǵynyń arasynda kelispeýshilikter týyndap, sodan soń burynǵy bas dırektorǵa qatysty qylmystyq is qozǵalǵan. Baýyrjannyń aıtýynsha, ol kelisimshartty dál sol kisimen jasasqan.

«Belgili bolǵandaı, ol bizdiń páter úshin tólegen aqshamyzdy ózi alyp qoıǵan. Biz ol týraly bilmedik. Bizge eshkim páterimizge qatysty qandaı da bir problemalar bar ekenin aıtpady», - deıdi otaǵasy.

Sot burynǵy bas dırektordyń «Akmolasvázstroı»-ǵa zıan tıgizgenin anyqtap, sonymen qatar Toqpanovtardyń otbasy da páterdi ıelenýi úshin aqsha tólegenin, biraq olardyń bas dırektordyń aqshany ıemdengenin bilmegeni dáleldengen.

«2012 jyly iri kólemdegi alaıaqtyq jasaǵany úshin isti bolǵan basqarýshy bıyl páterdi alý týraly aryz jazyldy. Endi sot bizdiń páterimizge qatysty jasalǵan kelisimsharttardyń barlyǵyn jaramsyz dep tanyp, baspanamyzdan shyǵarýda. Sýdıalar zańdy buzatyn bolsa, mundaı zańdardyń ne qajeti bar? Azamattyq kodeks boıynsha, AQ zańdy tulǵa retinde qaramaǵyndaǵy atqarýshy organ men laýazymdy tulǵanyń is-áreketterine ózi jaýap berýi tıis. Bas dırektor olarǵa múliktik zalal keltirse, onda olar bul jaıtqa bizdi aralastyrmaı sheshýi kerek edi ǵoı. Biz zań buzǵan joqpyz. Bas dırektorlar bir-birin tonaıdy da, ol úshin men kináli bolady ekenmin», - dep kúıinedi Baýyrjan.

19 tamyzda Toqpanovtar otbasyn páterden shyǵarý týraly sot úkimi shyqqan.

«Sot oryndaýshysy kelip, 14 qyrkúıekte bizdi kúshtep páterden shyǵarǵysy keldi, biraq qazir biz qalada bolmaǵandyqtan, ony júzege asyrý múmkin emes. Men tipti qaıda baratynymdy da bilmeımin? Bomj bolamyz ba? Bizdiń basqa baspanamyz joq. Biz adal satyp alýshymyz, qylmysker emespiz. Nemese bir ǵana sheshimim bar – sottyń zańsyz sheshimine qarsy alańǵa shyǵyp ózimdi órteý. Sýdıalar bizdi úıimizden jáne tirkeýden aıyrdy. Men krımınaldy jolǵa túsýim kerek pe? Meniń qandaı kinám bar ekenin maǵan eshkim túsindirmedi. Meniń bas dırektorǵa aqsha tólegenim durys emes pe? Biraq, keshirińizder, bas dırektor ol matrıaldy jaýapty tulǵa. Men alaıaqtyqtyń qurbany boldym», - deıdi ol.

Baýyrjan Joǵarǵy sottyń kollegıasyna hat jazypty. Sonymen qatar, ol QR Bas prokýrory Jaqyp Asanovqa istiń mán-jaıyn anyqtaýǵa kómektesýin surap júginipti.

«Men qaıda bararymdy bilmeımin. Áıelime «úıden ketip qal, men gazdy ashyp jiberemin» dedim. Biraq kórshiler bar ǵoı, olardyń ne kinási bar dep oıladym. Meniń joǵaltatyn eshnársem qalmady. Ólýden de aıanbaımyn», - deıdi Baýyrjan.