Nursultan Ábishuly: Eki myń jylǵa jetetin tarıhymyz bar. Bizdiń urpaq bilýi kerek, biz qurásheıin bir jaqtan paıda bola salǵan adam emespiz. Biz keshe ǵana aspannan salbyrap túsken eshteńesi joq halyq emespiz. Bizdiń tarıhymyz bar, ol tarıh búkil Qazaqstannyń jerinde saırap jatyr. «Bizdiń tarıhymyz sovet odaǵynyń tarıhy» dep keldik, sondyqtan osyǵan es jınap kóńil bóletin kez keldi. Sony biz handyqtyń 550 jyldyǵynan bastaımyz. Biz sol babalarymyzdyń, handyqtyń jıyntyǵymyz. Bizge olar keń jerdi saqtap qaldy. Árkim ózine «osyndaı en dala qazaqqa qalaı qaldy» dep suraq qoıatyn shyǵar? Halqymyz kóp emes... soǵan jaýap berý úshin handyqtan bastaýymyz kerek. Tarıhymyz qandaı degenge jaýap berýimiz kerek. Reseıdiń, Egıpettiń, Irannyń óz tarıhy bar, bizdiń nege tarıhymyz joq? Urpaqtarymyz aıaǵynan nyq turý úshin bizdiń art jaǵymyzda babalardan qalǵan el, jurt, handyq bolǵanyn, olar osy jer úshin kúreskenin, qan tókkenin urpaq bilýi kerek. Myna turǵan Qazaqstan – búkil tarıhtyń túp tamyry. Urpaqty osylaı tárbıeleý kerek. Tilimizdi, dinimizdi, ulttyǵymyzdy saqtap qalǵan qandaı keremet halyqpyz! «Tamyry tereń qara emen, qasqaıa kúter daýyldy» degen óleńdi sóz bar. Máńgilik el degen – ıdeıa, osy ıdeıanyń tóńiregine toptasý kerek. Qazaqtyń barlyq tarıhy – birigý tarıhy. Úsh júzdiń balasy birigip soǵysqa shyqqan kezde eshbir jaý tótep bergen joq. Bizdi bólip-jarǵan kezde jaý aldy, osyny este saqtaý kerek. ALLA bergen, ata-babalarymyzdyń tilegimen kelgen táýelsizdikti saqtap qalý úshin qazaqtyń óziniń ishindegi alaýyzdyqtan qutylý kerek. Túbinde ol bizge haýip bolýy múmkin. Ata-babalardyń bergen keń dalasyn, memlekettiligin qolymyzdan jiberip alý – ómirbaqı kúná bolyp sanalady. Táýelsizdikti alǵannan saqtap qalý qıyn...

Sýret: akorda.kz