Eýrazıalyq ekonomıkalyq odaqqa úlken syn- qater tónip tur. Bul týraly Qazaqstan Prezıdenti Nursultan Nazarbaev jetekshi qazaqstandyq BAQ ókilderimen suhbaty barysynda málim etti.

«Ótken jyldyń tarıhyna jazylyp jatsa da, qarbalasta keıbir oqıǵalar umytylyp jatqandaı kúı keshesiń. Báribir mańyzdy oqıǵalar oryn aldy. Astanada biz Eýrazıalyq ekonomıkalyq odaq qurý jónindegi kelisimshartqa qol qoıdyq. Bul ıdeıany 20 jyl buryn Máskeý memlekettik ýnıversıtetinde aıtqan bolatynmyn. Shynyn aıtaıyn, daǵdarysqa baılanysty búginde odaq úlken qaýip-qaterlerge ushyrap otyr», - dedi Elbasy.

Memleket Basshysy, odaqtyń qurylýy - Keńes úkimetine qaıtyp oralý emes ekenin taǵy qadap aıtty. «Táýelsizdigimizden aıyrylyp, jańa Keńes odaǵy qurylyp jatyr degen sózder aıtyldy, aıtyla da beredi. Bos sandyraq. Keńes odaǵyn qurǵysy keletinderde tipti, mı joq. Biz budan baıaǵyda-aq ketkenbiz, qaıtip oralý múmkin emes. Ol kezde ortaq Marks-Lenın ıdeologıasy boldy. Ol kelmeske ketti. Ýysynda ustaǵan komýnıstik partıa boldy, onyń da ǵumyry tarıh qoınaýynda. Biryńǵaı ekonomıkalyq «aǵza» boldy, endi ol joq. Jańa býyn ósip shyqty sodan beri. Kóshedegi oqýshydan qazir surańyz, Marks degen kim, Lenın degen kim dep. Ony surap ta kerek emes, sebebi tipti jańa býyn qalyptasyp úlgerdi», - dedi Prezıdent. Elbasynyń aıtýynsha, EAEO elderi arasynda taýar aınalymy 40 paıyzǵa ósken.

«Qazirgi jaǵdaılarǵa baılanysty onyń deńgeıi túsetini anyq. Sebebi, barsha álemniń ekonomıkasy túsýde. Aqsha jaǵynan qysyltaıań kórýde. Biraq taýar almasý jáne birlesken kásiporyndar qurý jaǵynan biz oń kórsetkishter kórip otyrǵanymyz anyq. Sebebi, shekara ashyq, adamdardyń barys-kelisi kóbeıedi, poıyzdar men júkter eshbir tekserýsiz ótýde. Iaǵnı, keńistigimiz úsh memleketke keńeıdi. Ekonomıka qalpyna keledi jáne bizdiń ıgiligimizge jumys jasaıdy», - dedi N.Nazarbaev.

"QazAqparat"