Almaty qalasy Turan ýnıversıtetinde qazaq álipbıin latyn grafıkasyna kóshirýge qatysty Almaty qalasy Qoǵamdyq keńesiniń otyrysy bolyp ótti, dep habarlaıdy Qamshy.kz aqparat agenttigi.

Qoǵamdyq keńestiń otyrysyna «Turan» ýnıversıtetiniń rektory, Almaty qalasy máslıhatynyń depýtaty, Almaty qalasy Qoǵamdyq keńesiniń tóraǵasy Rahman Alshanov moderator retinde qatysty. Sonymen birge, saıasatker Saırov Erlan Bıahmetuly, «Jastar» ǵylymı zertteý ortalyǵynyń dırektory, saıasatker Qalıev Talǵat Begimuly, «Kazinform» halyqaralyq aqparattyq agenttiginiń bas dırektory Omarov Asqar Qýanyshuly, Sh. Shaıahmetov atyndaǵy Tilderdi damytýdyń Respýblıkalyq úılestirý-ádistemelik ortalyǵynyń dırektory Tileshov Erbol Erdembekuly, Halyqaralyq aqparattyq tehnologıalyq ýnıversıtetiniń rektory, Almaty qalasy Qoǵamdyq keńesiniń múshesi Shynybekov Damır Ábdýhalıuly, «Jastar úni» JQQ tóraǵasy, Almaty qalasy Qoǵamdyq keńesiniń múshesi Babamuratov Dáýren Ábýtalıpuly, saıasattanýshy, Almaty qalasy qoǵamdyq keńesiniń múshesi Aıdos Sarym Qoǵamdyq keńestiń otyrysynda qazaq álipbıin latyn grafıkasyna kóshirý máselesine qatysty ózindik pikirlerin bildirip, baıandama jasady.

«Latyn álipbıine qatysty qazirgi tańda kóptegen jıyndar ótip jatyr, onyń birshamasyna qatysyp, latynǵa kósh týraly ıdeıaǵa qoldaýǵa bildirdik. Al, endi sheshim shyǵyp, qabyldanǵan kezde ony artqa tartý ol týdy jyqqanmen birdeı bolmaq. Latyn álipbıiniń nusqalaryna qatysty alyp-qashpa áńgimeler kóbeıip, el arasynda daý týyndaı bastaǵanda bul másele taǵy da keıinge shegeriledi me degen qorqynysh týyndaǵan bolatyn. Alaıda, qýanyshymyzǵa oraı, olaı bolmady. Bul máselege qatysty Elbasy jarlyqqa qol qoıyp, saıası sheshim qabyldandy. Al, biz úshin eń bastysy osy sheshimniń qabyldanǵany bolatyn.

Latyn álipbıiniń nusqasyna keler bolsaq, ol áli de talqylaný kerek. Aprobasıadan ótip, onyń tıimdi jáne álsiz tustarynyń barlyǵy da eskerilý qajet. Jan-jaqty talqyǵa salyp, eń durys, eń tıimdi, eń utymdy nusqaǵa toqtalýymyz qajet. 2025 jylǵa deıin ózgerister enýi múmkin, eń bastysy biz latyn grafıkasyna kóshemiz», - deıdi Almaty qalalyq Qoǵamdyq keńesiniń múshesi Dáýren Babamuratov.

Qazirgi tańda qoǵamda úlken talqyǵa túsip jatqan qazaq álipbıin latyn grafıkasyna kóshirý máselesine qatysty Ulttyq ǵylym akademıasynyń akademıgi, Halyqaralyq qazaq tili qoǵamynyń prezıdenti, A. Baıtursynuly atyndaǵy Til bilimi ınstıtýtynyń bas ǵylymı qyzmetkeri Ómirzaq Aıtpaıuly da óziniń pikirin aıtyp ótti.

«Qazirgi tańda jer-jerde latyn álipbıine kóshýge qatysty Elbasynyń jarlyǵy talqylanýda. Bul – biz kópten kútken shara bolatyn. Jurt muny saıası sheshim dep atap jatyr, al men bul isti tarıhı sheshim dep ataımyn. Tarıhı sheshim bolatyn sebebi, bizdiń táýelsiz el bolǵannan buryn, halyqaralyq qazaq tili qoǵamy eń aldymen tildiń táýelsizdigi úshin kúresti. Til táýelsizdigi arqyly qazaq tilin memlekettik tilge aınaldyrdy. Al, sodan keıingi iri oqıǵa – eldiń táýelsizdik alýy bolsa, odan keıingi taǵy bir iri oqıǵa elimizdiń astanasyn ózgertýi boldy. Sol oqıǵalardan keıingi taǵy bir eń iri  tarıhı oqıǵa – osy latyn álipbıine kóshý bolmaq.

Biz osy ýaqytqa deıin ózimizdiń ulttyq jazýymyzdy qalyptastyra almaı kele jatqan el bolatynbyz. Ulttyq jazýdyń negizin, bárimiz biletindeı, Ahmet Baıtursynuly qalaǵan bolatyn. Alaıda, biz ony ári qaraı damyta almaı qaldyq. Mine, endi qazirgi tańda sol ulttyq jazýymyzdy qalyptastyrýdyń úlken múmkindigi paıda bolyp otyr», - deıdi Ómirzaq Aıtpaıuly.

Onyń aıtýynsha, latyn grafıkasyna sózsiz áli de ózgertýler engiziledi.

«Kósh júre túzeledi. Qazir latyn álipbıi nusqalarynda birshama kemshilikter bar. Olardy qazir aıtyp, aıtysýdyń keregi joq. Eń bastysy biz jazýymyzdy qabyldadyq pa, naǵyz jumys endi bastalady», - deıdi Ómirzaq Aıtpaıuly.