Almatyda Nazerke Áripti óltirdi degen kúdikpen ustalǵan Talǵar aýdanynyń 33 jastaǵy turǵyny Isqaqov Qurbannyń soty bastaldy, dep Qamshy.kz aqparat agenttigi QazAqparatqa súıene otyryp jazady.
İsti qylmystyq ister boıynsha aýdanaralyq mamandandyrylǵan soty qarap jatyr. Sot jabyq rejimde ótýde. Qaıtys bolǵan Nazerke Áriptiń anasy Sáýle Sarbaeva QazAqparat tilshisine bergen suhbatynda qylmyskerge eń qatal jaza taǵaıyndaý úshin baryn salatynyn aıtty. «Men ol adamnyń ómir boıy túrmede otyrǵanyn qalaımyn.
Sebebi, buryn da azamattyq nekedegi áıelin 18 jerinen pyshaqtap óltirgen, birneshe ret zorlyq jasaǵan. Sol úshin 11 jylǵa kesilip, onyń 9 jylyn otyryp shyqqan. Sonda osyndaı qanisher adamdy qalaısha bosatýǵa bolady? Men ony ómir boıy túrmede otyrýyna qol jetkizýge tyrysamyn. Ol taǵy 10 jylda shyǵatyn bolsa, onda basqa qyzdardyń obalyna qalady», - dedi marqum Nazerkeniń anasy, japa shegýshi Sáýle Sarbaeva. Onyń aıtýynsha, Ysqaqov Nazerkeni óltirgenin moıyndap otyr.
Qazir sottalýshynyń qorǵaýshysy zorlaý faktisiniń bolmaǵanyn dáleldeýge tyrysyp jatyr. «Sotta da zorlady degen aıypty taqpańyz deıdi. Jaı ǵana óltirdim dep moınyna aldy. Qylmysker odan qorqyp turǵan joq. Ol zorlyq kórsetkenin moınyna alǵysy kelmeı tur. Biraq oǵan dálel jeterlik, qyzymnyń ish kıimi bolmaǵan, adam óltirýge zorlyqtan basqa motıv bolmaǵan. Qyzym meniń baı emes, onyń qaltasynda ýys-ýys aqsha joq. Tek taza pák qyz bolǵandyqtan, artyn jasyrý úshin óltirip tastady», - dedi ol.
Sottalýshynyń anasy Nazerkeniń ata-anasyna baryp balasynyń esi durys emestigin alǵa tartyp aqtap alýǵa tyrysqan. Alaıda, sot saraptamalarynyń nátıjesinde kúdiktiniń aqyl-esi durys ekeni dáleldendi. Almaty qalasy men Talǵar arasynda kóligimen jolaýshy tasýmen aınalysatyn kúdikti óz kinásin moıyndaǵan. İs materıaldaryna sáıkes, kúdikti Nazerkeni sol kúni qalaǵa jetkizip salmaq bolǵan. Jarty jolda boıjetkendi zorlap, býyndyryp óltirip Keńsaı zıraty jaqqa aparyp tastaǵan. Aıta ketý kerek, 10 shilde kúni 18 jastaǵy Nazerke Árip Tuzdybastaý aýylyndaǵy úıinen shyǵyp sol bette oralmaǵan. Keıin 6 qyrkúıekte Nazerkege uqsaıtyn qyzdyń denesi Keńsaı zıratynan tabyldy.
