Astana qalasy ákimdiginiń apatty úılerdi súrip tastaý boıynsha pılottyq jobasy sátti júzege asyrylýda. Jyl basynan beri 98 apatty úıdiń turǵyndary jańa úılerge kóshti, dep habarlaıdy Qamshy.kz aqparat agenttigi Astana qalasy ákimdiginiń medıa ortalyǵyna silteme jasap.

Astana qalasy turǵyn úı basqarmasynyń aqparaty boıynsha 2013-2016 jyldar aralyǵynda 117 apatty úı súrilip, 1570 otbasy jańa úıge kóshken.

«Osy jyly 111 apatty úıden, 1863 otbasyny kóshirý josparlanǵan, sonymen qatar, qazirgi kezde 98 apatty úıden 1425 otbasyny jańa úılerge kóshirý aıaqtalýda. Berilip jatqan úıler myna mekenjaılar boıynsha Astana qalasy, «Esil» aýdany E 16 kóshesi, № 2,4,6 úıler jáne Qutpanov kóshesi 28 úı», dep habarlady basqarma.

Qazirgi tańda qalǵan 13 apatty úıden 404 otbasyny kóshirý úshin páterlerdi tapsyrý jumystary júrgizilip jatyr. Súrilgen apatty úılerdiń ornyna saıabaq, alań, sporttyq alańdar salý josparlanǵan.

Al, súrilgen eski úılerdiń keı oryndaryna eger ınjenerlik komýnıkasıalar tolyq tartylǵan bolsa «Nurly jer» baǵdarlamasy aıasynda kópqabatty turǵyn úı keshenin salý josparlanǵan (Qutpanov-Altynemel, Shyntas, Respýblıka men Máskeý).

Mekemeniń habarlaýynsha, qazir súrilip jatqan 228 apatty úıden bólek, qosymsha taǵy 82 apatty jataq tektes úıler súrilýge jatqyzyldy.

Esterińizge sala keteıik, apatty-eski úılerdi súrip tastaý boıynsha pılottyq joba alǵash ret elordada TMD elderi arasynda ótkizilýde.