Ońtústik Qazaqstan oblysynda "destrýktıvti aǵym músheleri" dep ustalǵan úsh kúdiktiniń biri Alpamys Júsipbekovke úkim oqylyp, 3 jylǵa bas bostandyǵy shekteldi. Bul týraly Azattyqqa Saryaǵash aýdandyq sotynyń sýdásy Berik Kaıýpov aıtty, dep Qamshy.kz aqparat agenttigi jazady.
"Alpamys Júsipbekov Qylmystyq kodekstiń 174-babynyń 1-bóligi ("Jarıa túrde nemese aqparat quraldary arqyly dinı arazdyqty qozdyrý") boıynsha kináli dep tanylyp, úsh jyl merzimge bas bostandyǵyn shekteý jazasy taǵaıyndaldy" deıdi sýdıa. Sot úkimi zańdy kúshine áli enbegen.
Sot materıaldary boıynsha, Júsipbekov "2009 jyldan bastap din ustanǵan, 2017 jyldyń 1 tamyzynda "Alyp" saýda ortalyǵyndaǵy uıaly telefondar satatyn dúkeninde uıaly telefon satyp, ulttyq jáne dinı arazdyq týdyratyn nemese alaýyzdyqty nasıhattaıtyn beınetaspalardy ótkizgen. Tergeý barysynda mámile túzilip, Júsipbekov kinásin tolyq moıyndaǵan" deıdi sýdá.
Shymkenttegi "Garant" dúkenderi aýmaǵynda "destrýktıvti dinı aǵym múshesi" retinde ustalǵandardyń biri Baqytjan İztileýovtiń áıeli Aıgúl Satıevanyń Azattyqqa aıtýynsha, Baqytjan İztileýovti qamaýǵa alý merzimi taǵy bir aıǵa uzartylǵan.
Al Samat Borashevtiń isi sotqa túskenin Azattyqqa Maqtaral aýdandyq sotynyń sýdásy Seıilhan Musabekov rastady. Onyń sózinshe, Borashovtyń isin qaraý 14 jeltoqsanǵa belgilengenimen, kúdiktiniń sot zalyna jetkizilmeýine baılanysty 22 jeltoqsanǵa qaldyrylǵan.
Baqytjan İztileýov 19 qyrkúıekte Shymkentte, Alpamys Júsipbekov - Saryaǵash qalasynda, Samat Borashev Jetisaı qalasynda ustalǵan.
20 qyrkúıekte ustalǵan úsheýi Shymkentte "destrýktıvti dinı aǵym múshelerinen quralǵan qylmystyq top" quramynda boldy degen kúdikpen 19 qarashaǵa deıin qamaýǵa alynǵan bolatyn.
Júsipbekov pen Borashev Qylmystyq kodekstiń 174-babynyń 1-bóligi boıynsha kúdikti dep tanylǵan. Al İztileýov 174-baptyń 1 jáne 2-bóligi ("Aldyn ala sóz baılasý arqyly dinı alaýyzdyqty qozdyrý"), 256-baptyń 1-bólimi ("Terorızmdi nasıhattaý nemese terorızm aktisin jasaýǵa jarıa túrde shaqyrý") boıynsha kúdikti dep tanylǵan.
