Aqtóbede «Nurly jer» baǵdarlamasymen kotejder paıdalanýǵa berildi. Búgin barlyǵy 200-den astam adam baspanaly boldy, dep habarlaıdy QazAqparat. Aqtóbe qalasynda búgin 255 páter men 80 kotej ıesin tapty.
«Nur Aqtóbe» yqsham aýdanynda salynǵan baspananyń bári «Turǵyn úı qurylys jınaq banki» arqyly satyldy. Iaǵnı, baspana alýdy josparlaǵan adam jer kezeginde turýy mindetti. Eger jer telimin alý kezeginde bolsa, bank esepshotyndaǵy jıǵan qarjy páter qunynyń 30 paıyzyna jetse, tólem qabileti tekseriledi. Osy komısıa talaptaryn oryndaǵandar búgin qýanyshqa keneldi.
«Men ata-anammen birge turamyn. Ózim Aqtóbe feroqorytpa zaýytynda jumys istep júrmin. Bankke aqsha jınap, ata-anamnyń qalaýymen 10 sotyq jeri bar úı aldym. Aldaǵy 9 jylda úıdiń aqshasyn aı saıyn tóleımin. Men úshin tıimdi ári qoljetimdi»,- kotej ıesi Muqaǵalı Mámbetov. Qurylys jumystary «Nurly jer» baǵdarlamasymen júrgizilgen.
Jospar boıynsha jyl sońyna deıin memlekettik baǵdarlama aıasynda 20 kópqabatty úı men 194 kotej túgel paıdalanýǵa beriledi. «Memlekettik baǵdarlama boıynsha salynǵan úıdiń ár sharshy metri 120 myń teńge bolady. Baspanany qarapaıym adamdar, muǵalimder, dárigerler, jumysshy jastar alyp jatyr»,- dedi Aqtóbe qalasy ákiminiń orynbasary Jandos Baıyrhanov. Qonys toıyn toılap jatqan aqtóbelikterdi óńir basshysy Berdibek Saparbaev quttyqtap, jumysty der kezinde aıaqtaǵan qurylysshylarǵa alǵysyn jetkizdi.
«Qurylysshylarǵa rahmet aıtamyn. Olar aıazǵa qaramastan jumysty toqtatqan joq. Alǵashqy aılarda qarjy bólingen joq. Sonda da isti bastap ketip, sátti aıaqtady. Qurylys jumystary únemi baqylaýda boldy. Bizdiń oımyzsha, páterlerdiń sapasy jaqsy, talapqa saı keledi»,- dedi B.Saparbaev. Aıta keteıik, 80 myńǵa jýyq aqtóbelik Turǵyn úı qurylys bankinen esepshot ashyp qoıǵan. Al 140 myń adam jer kezeginde tur. Aqtóbe qalasy boıynsha páter kezeginde turǵandar sany - 23 myń.
