Qazaqstan Respýblıkasy Aqparat jáne komýnıkasıalar mınıstrligi jáne "Qazaqstan" ulttyq arnasynyń qoldaýymen ótken otandyq megajobada kúı, terme jáne dástúrli án qatarly úsh atalymda baq synaǵan jas talanttardy irikteý sońǵy kezeńderde qazylar alqasyna da úlken qıyndyq týdyrǵan. Ol - fınalǵa shyǵar úzdikterdi saralaýdaǵy qıyndyq edi. Sebebi úsh aıǵa sozylǵan telenusqada sýyrylyp sońǵy alty úmitker qalǵan bolatyn. Tipti sońǵy aınalymdaǵy 12 qatysýshydan alty úzdikti anyqtap, fınalǵa shyǵarýdyń ózi ońaı bolǵan joq.

«Bul baıqaýda biz barynsha ádil bolyp, kórermen halyqtyń pikirimen barynsha sanasyp sheshim shyǵarýǵa tyrystyq. Degenmen «júırikten júırik ozar jarysqanda» degendeı baıqaý bolǵan soń bireý ozyp, bireý qalatyny zańdylyq. Ózderińizge ýáde bergenimdeı, ótken baıqaýdyń qorytyndysy saqtalǵan konvert qaltamda, jeńimpazdyń kim bolǵanyn sol arqyly ǵana biletin bolamyz. Al bul «Men qazaqpyn» jobasy halyqtyń kópten kútken, ulttyń, eldiń kókeıinde kópten beri saqtalyp kele jatqan joba edi, mınıstrlikke, telearna basshylyǵyna kelgen bilikti jigitterdiń arqasynda júzege asty, alǵystan basqa aıtarym joq» - dedi jobadaǵy qazylar alqasynyń tóraǵasy Myrzataı Joldasbekov.

Sonymen Myrzataı Joldasbekovtiń qaltasyndaǵy hatta jasyrylǵan jeńimpazdar mynalar eken:

Kúı – Almas Eleýsizov (Aqtóbe)

Terme – Ospan Qulsymaq (Mańǵystaý)

Dástúrli án – Beıbit Musaev (Almaty oblysy)

Ár jeńimpazǵa 1 mln teńgeden júlde berildi.

Sonymen qatar jobaǵa qatysyp, «Kórermen kózaıymyna» aınalǵan Jambyl oblysynan kelgen Sulýjan Ábenova arnaıy syılyqqa ıe boldy.

Al ótken baǵdarlamada úzdik 12 qatysýshynyń biri bolyp, óziniń erekshe darynymen kózke túsken jobanyń eń jas qatysýshysy mańǵystaýlyq kúıshi Almaz Jetibaevqa ózi ýáde bergenindeı Myrzataı Joldasbekov arnaıy syılyǵyn berdi.