Búgin aqyn Almas Ahmetbekulynyń týǵan kúni. Aqynǵa Qamshy portaly 5 jyldyǵynda «Alash arystarynyń 100 izbasary» medalyn taqqan.

Almas Ahmetbekuly – 1961 jyly QHR, Tarbaǵataı aımaǵynda dúnıege kelgen. 1982  İle pedagogıkalyq ınstıtýtynyń Fılologıa fakúltetin támamdaǵan. 1982-1992 jyldar aralyǵynda Sháýeshek qalasynda shyǵarylatyn «Tarbaǵataı» ádebı jýrnalynyń redaktory bolyp qyzmet atqaryp, 1993 jyly tarıhı Otanyna oraldy.

1993-1995 jyldary «Jas Alash» gazetinde tilshi, 1996-2006 jyldary ál-Farabı atyndaǵy QUÝ jýrnalısıka fakúltetinde aǵa-oqytýshy bolyp qyzmet atqarǵan.

1997 jyly QR Parlament Májilisinde baspasóz qyzmetkeri bolyp jumys istegen.

Almas Ahmetbekuly ótken ǵasyrdyń 80-jyldarynda poezıaǵa álemine aralasqan, qazaq ádebıetinde ózindik qoltańbasy bar dara ári talantty aqyn. Oıly obrazǵa, shynaıy sezimge toly syrshyl óleńderiniń arqasynda onyń esimi sol 80-jyldardyń ózinde-aq Shyńjań qazaqtaryna keńinen tanymal boldy. Almas óleńderiniń men biletin bir ereksheligi – qarapaıym halyq tili arqyly áseri mol kórkem oımen qıysatyny. Demek onyń jasampazdyǵynda til,
obraz, boıaý, ıdeıa – osy tórteýi sheber úılesim taýyp otyrady. Bul rette onyń erterekte jazǵan «Týǵan jerim – balalyǵym», «Sáýirdiń bulty», «Aptap» t.b. óleńderin ataýǵa bolady. Onyń «Bozingen» atty óleńi tunyp turǵan dala sazy deýge laıyq. Óleńdegi túıe janýarynyń minezdemesi, botasynyń bozdaýy, japyryq órkeshi men jabyrqaý janary arqyly bergen teńeýleri men obrazdy oılary adam boıyndaǵy Uly dalaǵa, Anaǵa, Otanǵa degen til jetkisiz tylsym saǵynyshty qozǵap, keńsirigińdi ashytyp qoıa beredi.

Qazaqstan Respýblıkasy táýelsizdik alǵannan keıin, Almas alǵashqylardyń biri bolyp óziniń tarıhı Otanyna oraldy. Elimizdiń táýelsizdik alýy, shettegi aǵaıyndardyń Otanǵa oralýy, bolashaqqa jol tartqan tyń bastamalar, jas býynnyń erik-jigeri onyń shyǵarmashylyq izdenisterine tyń serpin berdi. Ózi de qoǵamdyq jumystarǵa belsene aralasa júrip, ádebı jasampazdyqpen aınalysty. Nátıjesinde, onyń qalamynan asqaq patrıottyq rýhqa toly «Kók týdyń jelbiregeni» atty óleń týdy. Keıin aqyn ári kompozıtor Ermurat Zeıiphanuly oǵan áýen jazdy. Búginde bul án elimizdegi barlyq saltanatty jıyndarda, mereke-meıramdarda, áskerı bólimderde, oqý oryndarynda shyrqalady. Ór serpigen, bıik azamattyq pafosqa toly bul án sheteldegi qazaqtar arasynda da keńinen taralyp, bir kezde erkinen tys shekaranyń syrtynda qalǵan, nemese amalsyzdan shet jurttarǵa ketken aǵaıyndardyń Otanǵa, táýelsiz elge degen saǵynyshyn oıatyp, júregine nur quıýda. Sol sebepten, bul týyndy elimiz táýelsizdiginen beri jaryqqa shyqqan patrıottyq ánder men óleńderdiń kóshin bastap tur. 

QR Mádenıet qaıratkeri Almas Ahmetbekulynyń QR Táýelsizdiginiń 25 jyldyǵyna oraı «Kók týdyń jelbiregeni» atty kitaby jaryq kórgen.

Aqynnyń týǵan kúnine oraı, «Qamshy» portaly aqynnyń birneshe óleńi men onyń sózine jazylǵan «Kók týdyń jelbiregeni» ánine Qazaqstan Respýblıkasy Táýelsizdiginiń 20 jyldyq mereıtoıyna oraı shyqqan beınebaıandy, sondaı-aq, aqynnyń ómiri men shyǵarmashylyǵyna arnalǵan «Qazaqstan» arnasynyń «Poezıa álemi» baǵdarlamasyn usynady.

KÓSH, KÓSH, KÓSH!

(Mustafa Óztúrikke)

Er jigit ol ózin myqtap shyńaǵan.

Myqty bolsa sondaı bolar bir adam.

Bulshyq etteı buıra-buıra qaıratyn,

tórt muhıttan, bes qurlyqtan quraǵan.

Atajurtyn ańsaǵanda sol jigit

júrek jasy kól bolyp,

janymenen jylaǵan.

Jer dúnıeni shyraınalyp shabylyp,

en dalaǵa táńirideı tabynyp.

ol da jetti Otanyna saǵynyp,

biz de jettik sabylyp.

Erkin Eli – áıgi bolyp álemge,

Kóktýymyz kókte jelbiregende.

Ýaqyt ana sheksiz baqyt bergende,

zaman zalym oń jambasqa kelgende,

Qaıratymen ańyz bolǵan qaıran er,

aqylymen abyz bolǵan qaıran er,

(ómir taǵy qadamynan jańylyp),

qapıada sapar shekti máńgilik,

Kók baıraǵyn kókiregine jamylyp.

Ýaqyt solaı, bolmaıtyn is bolady,

Janǵa bir sát qaıǵy-ýaıym tolady.

Bárimiz de bul dalanyń ıesi,

Bárimiz de bul dúnıeniń qonaǵy.

Mynaý dala bizdiń ǵana dalamyz,

talaı juldyz jarqyraıdy taǵy da,

talaı gúlder qapylysta solady.

Qazaq jeri qaıtqan qustyń kóshimen

qıqýlaǵan qýanyshqa tolady.

Jan-júrekke uıalasyn kúsh bolyp,

Kóktýyńnyń altyn zerli jolaǵy.

Zar zamanda Atajurttan aıyrylyp,

qan qylyshy maırylyp,

soǵa almaı bir qaırylyp,

qapy ketken babalarym –

batyrlarym,

qosh-qosh-qosh!

Sol batyrdyń áýleti,

endi oılanba,

Atajurtqa

kósh, kósh, kósh!

BİZ KİMBİZ?!

Aǵaıyn, «kimsiń »deme,

oralmanbyz.

Úıirinen adasqan taı sekildi

bir  aqmyltyq boranda joǵalǵanbyz.

Kókiregi tirelip kók naızaǵa

mal men jannan myń márte tońalǵanbyz.

Aǵaıyn, «kimsiń »deseń,

qyzyl qanbyz.

Iilmegen bastaryn qylysh kesip,

rýymen ý iship qyrylǵanbyz.

Bir qaıyrylyp soǵatyn kúndi kútip,

túıe qulap, júk aýyp, shubyrǵanbyz.

Aǵaıyn, «kimsiń»  deme,

aqtabanbyz.

Eri myltyq, qatyny besik alyp,

Famır, Altaı, Álpini taptaǵanbyz.

Týǵan jerdiń bir shymshym topyraǵyn

altyn sandyq túbinde saqtaǵanbyz.

Aǵaıyn, «kimsiń» deseń,

Qara ormanbyz.

Ustaranyń júzindeı bul dúnıeden

myń túńilip, myń márte ońalǵanbyz.

Qarǵybaýǵa moıynyn usynbaǵan

qabaǵyna kek qatqan kókarlanbyz.

Aǵaıyn, «kimsiń »deseń,

oralmanbyz.

Kók týyna tamyzyp kózdiń jasyn,

saǵynyshyn saryqqan mol armanbyz.

«Qazaqstan, bir janym sadaǵań» dep,

jas otanǵa jarmasa oralǵanbyz.

Aǵaıyn, «kimsiń» deseń,

Qara ormanbyz.

Aǵaıyn «kimsiń» deseń,

Kók arlanbyz.

Anama

Bir án-óleń arnaıyn anama men –

Án arnaǵan sıaqty dalama keń.

Shetsiz baıtaq dalamdy sheksiz súıdim

Sútpen bitken mahabbat – sanamenen.

Teńesetin jyr jazyp dalamenen,

Bir án-óleń arnaıyn anama men.

Bir án-óleń arnaıyn men anama

Kóterilgen kún syndy jańa ǵana.

Kúndeı ystyq mahabbat, meıirimdi

Taratatyn álemge ana ǵana.

Kóterilgen kún syndy jańa ǵana

Bir án-óleń arnaıyn men anama.

Bir án-óleń arnaıyn anama men,

Tunyq ózen – tuńǵıyq maǵynamen.

Eljiregen júzińnen kórinedi-aý,

Emirengen júregiń bala degen.

Tereń teńiz-telegeı maǵynamen

Arnaıyn bir, anajan, saǵan óleń.