QR Bilim jáne ǵylym mınıstrligi baspasóz konferensıasynda qazaqstandyq muǵalimderdiń jalaqysyn ósirý týrasynda máseleni qozǵady. Sondaı-aq arnaıy «elordalyq muǵalim» mártebesin berý týraly usynys aıtyldy. Bul týraly BǴM Mektepke deıingi jáne orta bilim departamentiniń dırektory Sholpan Qarınova aıtty, dep jazady Qamshy.kz aqparat agenttigi.

«Reseıde arnaıy máskeýlik muǵalim degen mártebe bar. Sol sebepti olardyń jalaqysy ózge aýdandardaǵy muǵalimderge qaraǵanda kóbirek. Bizdiń muǵalimder elordaǵa saı kıinýge múmkindikteri joq ekenin aıtyp aryzdanady. Al oqýshylar aldymen syrt kelbetine qarap baǵalaıdy. Sondaı-aq Astanada jol aqysy men azyq-túlik te qymbat», - dedi mınıstrliktiń ókilderine jýrnalıs.

Qarınovanyń aıtýynsha, bolashaqta bul másele kóteriletin bolady.

«Bilim jáne ǵylym mınıstrligi árdaıym pedagogıkalyq mamandyqtyń dárejesin arttyryp, jalaqysyn kóterý týrasynda úzdiksiz jumys istep keledi. Alaıda búginge deıin elordalyq muǵalim mártebesi qarastyrylmaǵan. Josparda bar bolǵanymen, bul máseleni aldymen respýblıkanyń, sondaı-aq Astana qalasynyń muǵalimderi arasynda talqyǵa salý qajet. Jumys áli bastalǵan joq, sol sebepti naqty aqparat berýge áli erte», - dedi Qarınova.

Tengrinews.kz portalynyń málimetinshe, Bilim jáne ǵylym vıse-mınıstri Bıbigúl Asylova elordalyq muǵalimderdiń jalaqysy eshqandaı mártebesiz-aq kóteriletinin aıtqan.

«Bizde eńbekaqy tóleýdiń biryńǵaı júıesi bar. Ol barlyq qyzmetkerge birdeı jáne aımaqtyq koefısıentke baılanysy joq. Alaıda bul júıe júıe arqyly birneshe máseleniń sheshimi tabylady dep oılaımyn jáne muǵalimder úshin de stımýl bolady», - dedi Asylova.