Sýkerberg juma Facebook-te jańalyq qalyptastyrý algorıtmin ózgertýge nıet bildirgennen keıin kompanıa aksıalarynyń baǵasy 3,9 paıyzǵa tómendedi dep habarlaıdy Qamshy.kz aqparat agenttigi Qazaqparatqa silteme jasaı otyryp.

Esterińizde bolsa, juma kúni Mark Sýkerberg jańalyqtar lentasynyń ózgeretinin habarlaǵan edi. «Alǵashqy ózgerister jańalyqtar taspasyna qatysty bolmaq. Sizder (qoldanýshylar) ol jerden dostaryńyz, otbasyńyz jáne toptar týraly aqparatty jıi kóretin bolasyzdar. Sebebi, biz osy jospardy birinshi orynǵa qoımaqpyz. Al, kompanıalardyń, brendter men BAQ-tyń jarıalaǵan materıaldary taspadan sırek kórinedi», - dep jazdy Sýkerberg óziniń áleýmettik jelidegi paraqshasynda.

Osydan soń Facebook-tiń aksıalary 3,9% arzandap, 2,9 mıllıard AQSH dollary kóleminde shyǵyn keldi.

Bloomberg Billionaires Index agenttiginiń málimetinshe, osy ózgeristen keıin onyń baılyǵy 77,3 mıllıard dollardan 74,4 mıllıard dollarǵa deıin kemidi.