İnińiz, ulyńyz, qaryndas-sińlińiz bolashaqta bedeldi, abyroıly hám syıly bolǵanyn qalasańyz, jaqsylap oqyńyz.

Birinshi: tárbıe úıden bastalady. Sondyqtan úıde jaqsy sóz aıtyp, kóńildi sóılesińiz. Shylym men alkogóldyń zıany týraly kúnine 1 mezgil qulaǵyna quıyp otyryńyz. 

Ekinshi: balańyzdyń bólmesin kompúter, oıynshyq, t. b. qajetsiz gadjetterge toltyrmaı, qabyrǵaǵa álem kartasyn ilip, sórelerdi kitaptarǵa toltyryńyz. Álem kartasy − tunyp turǵan ensıklopedıa! Qaraǵan saıyn balanyń álem tanýǵa qyzyǵýshylyǵy arta túsedi. Ol qyzyǵýshylyǵy kitap oqýǵa ıtermeleıdi. Al kitap − sarqylmas baılyq! 

Úshinshi: aqshany kereksiz jumsaq oıynshyqtarǵa shashqansha Alash kósemderiniń, ult maqtanyshtarynyń portretin jasatyp, qabyrǵaǵa ilińiz nemese shaǵyn álbom, býkletter jasap berińiz. Ol kisilerdiń kim ekenin, el úshin ne istegenin, qansha ter tókkenin aıtýdan jalyqpańyz. Bul onyń aldaǵy ýaqytta kimge qarap boı túzep, qandaı tulǵa bolyp qalyptasatynyna kómektesedi. Jastaıynan "betmen", "sýpermen", "órmekshi adam", "halktardy" kórip, solarǵa eliktegennen áldeqaıda jaqsy ǵoı, solaı ma? 

Tórtinshi: Ózińizdi "sýper saıasatker" sanap, balanyń aldynda kósilip, polısıany, dárigerdi, úkimetti, ustazdy qaralap, jerden alyp, jerge salyp otyrýdy doǵaryńyz! Qaıtalaımyn, doǵaryńyz! Bala jastaıynan mundaıdy tyńdasa, qoǵamǵa qarsy kózqaraspen ósedi. 

Besinshi: Balańyz oıynhana, túngi klýb sońynda ketpesin deseńiz, megasentr, saýda úıleri, kafe-restorandarǵa aparaǵansha meshit, kitaphana, murajaı, kesene, mádenı ortalyqtarǵa aparyp úıretińiz. Mundaı ortada ósken bala túngi klýbtardan jıirkenetin bolady.

Altynshy: "Olımpıadada nege qazaq balasy joq?" - degen suraq týyndamas úshin sizderge ótinish: balańyzdy úıirmege berińiz. Kúıgen dúnıe kúıip ketsin! Meıli, jańa shýbaǵa aqshańyz jetpeı qalsyn, sol aqshaǵa balańyzǵa qajetti sport jabdyqtaryn áperińiz. Úıge týrnık, kir tastaryn aldyryńyz! Aldyra almaısyz ba, úıirmege bere almadyńyz ba − "óı, osy qazaqtar dop tebe almaıdy, óı, qazaqtardan túk shyqpaıdy", − degen áńgimeni doǵaryńyz!

Jetinshi: salt-dástúrdi úıretýge, ımanyn kúsheıtýge, rýhyn shyńdaýǵa ýaqyt bólińiz! 

Segizinshi: ulyńyz kóshede tóbelesip kelse, urysyp, jekirýdiń qajeti joq. Ol bala bolǵan soń báribir tóbelesedi. "Oı, balam, ol senen úlken ǵoı, sonda da taısalmaǵan batyrym", − dep rýhtandyryp, "bireýge óziń tıispe, tıisse, namysyńdy berme", − dep aıtyńyz! Bul, menińshe, ynjyq, rýhy álsiz qazaq jigitteriniń sanyn azaıtady. Rýhty jigitter kóbeıse, eshqandaı ult tóbemizge shyqpas edi...

Aty shyqpaǵan qyzymyz ben atyshýly batyr urpaǵymyz kóbeısin!
Sanaly, salıqaly urpaq − ata-ana úshin eki dúnıeniń de baqyty!

Maqsat Álıev