Búgin QR Aqparat jáne komýnıkasıalar mınıstri Dáýren Abaev otandyq serıaldardy túsirý jumysy boıynsha baıandap berdi, dep xabarlaıdy Qamshy.kz aqparat agenttigi QazAqparatqa silteme jasap.

Mınıstrdiń aıtýynsha, búginde otandyq serıaldardy damytý jumysyna negizgi basymdyq berilip otyr. Bul - Memleket basshysynyń tikeleı tapsyrmasy.

«Biz xalqymyzdyń salt-dástúrin, tarıxy men erekshe qundylyqtaryn nasıxattaıtyn teleónimderge basa nazar aýdaryp otyrmyz. Máselen, ótken jyly ártúrli janr men taqyrypta 40 serıal kórermenge usynyldy. Otandyq telexıkaıalardy tek memlekettik arnalarǵa emes, komersıalyq telearnalarǵa da tapsyrǵan bolatynbyz. Ol serıaldar arqyly qoǵamnyń áleýmettik tustary - otbasylyq qundylyqtar, bereke men birlikti nasıxattap, xalqymyzdyń baı tarıxy men dástúrin kórsetýge tyrystyq», - dedi D.Abaev «Qazmedıa» ortalyǵynda ótken kezdesýde.

Dáýren Áskerbekuly serıaldardyń reıtıńi birden kóterilmeıtinin jetkizdi. Sebebi kórermen qaýymnyń talǵamy áralýan.

«Eń bastysy, osy jumystar shyǵarmashylyq toptardyń kásibı deńgeıin ósirýge yqpal etedi dep senemiz. Biz qurmetti kórermenderimiz ben zıaly qaýymnyń pikirin de bilip otyrmyz.

«Ekrandy sheteldik serıaldar jaýlap aldy» dep jatqandar da bar. Sondyqtan biz aldymyzǵa aýqymdy strategıalyq maqsat qoıdyq. Ol maqsatymyz - sapaly otandyq telefılmderdiń sanyn arttyrý, kórermen talǵamyna saı jaqsy serıaldardy túsirý», - dep atap kórsetti D.Abaev.

QR Aqparat jáne komýnıkasıalar mınıstri Dáýren Abaev memlekettik-aqparattyq tapsyrystyń tıimdiligin túsindirip berdi.

«Búginde memlekettik-aqparattyq tapsyrysty synaıtyndar az emes. Atalǵan tájirıbeden bas tartý qajet deıdi. Dál qazir olaı isteýge bolmaıdy. Memlekettik sýbsıdıalaýdan tolyǵymen bas tartsaq, qazaqstandyq medıa keńistiktiń damýyn tejeımiz. Nege? Sebebi memlekettik-aqparattyq tapsyrys aıasynda jańa jobalarǵa qoldaý jasalady, otandyq prodakshn-ındýstrıasyna qarjy quıylady. Sonyń arqasynda medıa naryq damyp jatyr», - dedi D.Abaev búgin «Qazmedıa» ortalyǵynda.

Mınıstrdiń aıtýynsha, memlekettik sýbsıdıalaý arqyly sheteldik kontenttiń úlesin azaıtýǵa múmkindik bar.

«Men bilemin, keıbireýler memlekettik-aqparattyq tapsyrysty toqtatý qajet dep sanaıdy. Olaı istesek, sheteldik kontenttiń úlesi artady. Qazir barlyq derlik respýblıkalyq arnalarda ózge eldiń ónimderin satyp alý kólemi qysqaryp jatyr. Sonyń ornyna ózimizdiń serıaldarymyz, derekti fılmderimiz ben tok-shoýlarymyz keldi. Úshinshiden, jekemenshik arnalarǵa bólingen memlekettik tapsyrys qarjysyn qazaq tildi baǵdarlamalardyń sanyn arttyrýǵa baǵyttalady. Memlekettik tildi biz osy arqyly da qoldaımyz. Tórtinshiden, memlekettik sýbsıdıalaý «Balapan», «Qazsport» pen «Elarna» sıaqty komersıalyq jaǵynan tıimsiz jobalardy júrgizýge múmkindik berip otyr. Besinshiden, memlekettik-aqparattyq tapsyrys aıasynda biz sıfrlyq texnologıalardy damytyp, telearnalardy xalyqqa tegin taratyp jatyrmyz», - dep atap kórsetti D.Abaev.

Aıta keteıik, ótken jyly memlekettik aqparattyq tapsyrys aıasynda 40 teleserıal túsirilgen bolatyn. Atalǵan kórsetkish bir jyl buryn bolǵan mejeden eki esege artyq.