Almatyda «Memlekettik satyp alý týraly» jańa Zańǵa arnalǵan dóńgelek ústel ótti. Sharaǵa QR Qarjy vıse-mınıstri Dáýren Keńbeıl, memlekettik organdardyń, Kásipkerler palatasynyń, bıznes-qaýymdastyqtyń ókilderi jáne qalalyq máslıhat depýtattary qatysty.

Dóńgelek ústelge qatysýshylar 2025 jyldyń 1 qańtarynan bastap kúshine engen «Memlekettik satyp alý týraly» Zańnyń negizgi tarmaqtaryn talqylady. D. Keńbeıl zańnyń tıimdi tustary men onyń alǵashqy nátıjelerine toqtaldy. Osylaısha, endi satyp alýlardyń jeńimpazdary 10 jumys kúni ishinde anyqtalady, al reıtıńtik-balldyq júıe boıynsha konkýrstar nebári 5 jumys kúni ishinde ótedi. Bul rette jergilikti jetkizýshiler úshin shartty jeńildikter 1-den 2%-ǵa deıin ulǵaıtyldy.

Vıse-mınıstrdiń aıtýynsha, qazirdiń ózinde áleýmettik mańyzy bar nysandar boıynsha kelisim-sharttar jasalyp, jeńimpazdardyń basym bóligi bolyp jergilikti kompanıalar anyqtalǵan. Aǵymdaǵy jyldyń bir jarym aıynda jalpy quny 1,3 trıllıon teńgeden asatyn 330 myń kelisimshart jasalsa, ótken jyly osy kezeńde 339 mıllıard teńgege kelisimshart jasalǵan.

Qatysýshylar jańa Zańnyń bıznes-klımatqa oń yqpalyn, satyp alynatyn taýarlardyń sapasyn arttyryp, otandyq taýar óndirýshilerdi qoldaýǵa baǵyttalǵanyn atap ótti.

Qarjy vıse-mınıstri Dáýren Keńbeıl : «Bizdiń mınıstrlik memlekettik satyp alýdyń barynsha ashyq júıesin qurýǵa umtyla otyryp, bıznes pen memlekettik organdardyń usynystaryna árqashan ashyq», - dep atap ótti.