Memleket basshysy elordadaǵy birqatar nysandy aralady.

Qasym-Jomart Toqaev Qazaqstan Respýblıkasy Prezıdenti Arhıviniń jańa ǵımaratyna bardy. Memleket basshysynyń tapsyrmasyna saı arhıv Almatydan Astanaǵa kóshirildi. Bul el tarıhyna qatysty qujattar saqtalatyn oryn ǵana emes, bilim jáne ǵylymı-ádistemelik keshen retinde qyzmet kórsetetin Ortalyq Azıadaǵy alǵashqy arhıv bolmaq.

Arnaýly ǵımaratta muraǵat qoımasy, zerthanalar, ınteraktıvti ekspozısıa jáne oqyrman zaldary, jumys bólmeleri men ákimshilik aýmaq ornalasqan. Mundaǵy 24 muraǵat qoımasy qaǵaz júzindegi qujattardy, dybystyq-beınelik jazbalardy saqtaýǵa, sondaı-aq shaǵyn taspalardaǵy jáne elektrondyq qujattardy saqtandyrý qoryn ornalastyrýǵa arnalǵan.

Prezıdent Arhıvinde Qazaqstannyń 1918 jyldan bergi saıası tarıhyna qatysty qujattardyń mol qory jınaqtalǵan. Atap aıtqanda, qorda elimizdiń táýelsiz memleket retinde qalyptasýy, syrtqy jáne ishki saıasaty, halyqaralyq qatynastary, ekonomıkalyq qaıta qurý úrdisteri men áleýmettik-mádenı damýy boıynsha materıaldar bar.

Sondaı-aq, Qasym-Jomart Toqaev Kúlásh Baıseıitova atyndaǵy Qazaq ulttyq óner ýnıversıtetinde júrgizilip jatqan qaıta jóndeý jumystarynyń barysymen tanysty.

Memleket basshysyna jańǵyrtý jumystarynan keıin bas ǵımarattyń kólemi 10 myń sharshy metrge ulǵaıyp, 38 myń sharshy metrge jýyqtaǵany jóninde baıandaldy.

Sonyń nátıjesinde jańa arnaýly aýdıtorıalar ashýǵa múmkindik týdy. Aýqymdy is-sharalar ótkizetin 1100 oryndyq úlken konsert zaly paıdalanýǵa beriledi. Budan bólek, oqý korpýsynda akademıalyq mýzykaǵa arnalǵan kameralyq zal, daıyndyq stýdıalary, stýdentter men ózge de sýretshilerdiń týyndylary qoıylatyn kórme galereıalary bar.