Elordada 2017 jyldan beri júzege asyrylyp kele jatqan “Sergek” jobasy bıyl 13 naýryzda aıaqtalady. Bul týraly Astana qalasynyń Sıfrlandyrý jáne memlekettik qyzmetter basqarmasynyń basshysy Dıdar Súleımanov máslıhat otyrysynda málimdedi.

“Sergektiń” ornyna Astanada jasandy ıntellekt negizindegi qalalyq ınfraqurylymdy basqarýdyń jańa júıesi iske qosylady. Buǵan deıin máslıhat otyrysynda jańa joba tanystyrylǵanyn jazdyq. 

Dıdar Súleımanovtiń sózinshe, jańa joba G42 holdıńine kiretin halyqaralyq Presight kompanıasymen (BAÁ) birlesip júzege asyrylady.

Jańa jobany ázirleý kezinde qazirgi júıeniń kemshilikteri eskerildi. Atap aıtqanda, aparattyq-baǵdarlamalyq keshenniń úzdiksiz jumys isteýi úshin turaqty elektr qýatymen qamtamasyz etý josparlanǵan. Sonymen qatar júıeniń negizgi elementteri, sonyń ishinde jalpy beınebaqylaý kameralary, optıkalyq baılanys jelisine qosylady, bul beıneaǵyndy turaqty túrde berýge múmkindik beredi, – dedi Dıdar Súleımanov.

Qazirgi tańda operatorlar beıneaǵyndy berý úshin 4-5 túrli WMS-júıelerin paıdalanady, bul olardyń jumysyn qıyndatady. Jańa joba aıasynda biryńǵaı beıneaǵyn berý júıesi engizilip, monıtorıń tıimdiligi arttyrylady.

Qoldanystaǵy ınfraqurylym jańa jeke seriktestiń basqarýyna beriledi, bul júıeniń turaqty jumysyn qamtamasyz etedi. Joba aıasynda:

• 22 myń jalpy beınebaqylaý kamerasy,
• 732 aparattyq-baǵdarlamalyq keshen – jol qıylystarynda,
• 470 aparattyq-baǵdarlamalyq keshen – syzyqtyq ýchaskelerde ornatylady.

Júıe JQE-niń 15 túrin buzýdy jáne 35 túrli beıneanalıtıkany tirkeıdi. 

Spıker ataǵandaı, joba 2030 jylǵa deıin josparlanǵan, al onyń ınvestısıa kólemi – 53 mıllıard teńgeni quraıdy. Qarjylandyrý tolyǵymen jeke seriktes esebinen qamtamasyz etiledi, al jumystyń 60%-yn qazaqstandyq kompanıalar oryndaıdy. Investorǵa tólemder tek nysan tolyq paıdalanýǵa berilgennen keıin ǵana júrgiziledi.