2017 jyly komedıa janrynyń ózinen ondaǵan kıno kórermenge jol tartty.  Sonyń ishindegi eń qatty talqylanǵany mynalar boldy:

 «Aǵa ma, álde neke me» (Brat ılı brak). Ernar Nurǵalıevtiń rejıserlik etýimen túsirilgen fılm kórermen arasynda qoldaý tapty. Komedıa janryndaǵy bul týyndyda Gaýhar esimdi qyz óziniń súıiktisin bes birdeı aǵasymen tanystyrmaqshy. Sújet boıynsha eki ǵashyq bes túrli er adamnyń qarsylyǵy men qyrsyq minezine qaramastan qosylady. Kınosúıer qaýymnyń aıtýynsha, atalmysh týyndy «bir ret kórýge jaraıdy». Jeńil komedıanyń kemshiligi de az emes. Birinshiden, fılm naqty bir tilde túsirilmegen. Iaǵnı dıalogtyń barlyǵy «shala qazaqsha» júredi. Ekinshiden, senarı gollıvýd fılmderiniń negizinde jazylǵan sıaqty. Bizdiń mentalıtetimizge jat. Máselen, 50 jastaǵy er adam klýbtan-klýbqa qydyryp júretin, basyna parık kıgen, aqyl-esi toqtamaǵan adam retinde kórsetiledi. Al Marseldiń (basty róldegi qyzdyń burynǵy jigiti) anasy – ózinen jas áıel, nege ekeni belgisiz, ekeýi motosıklmen serýendep júredi. Fılmdegi qaljyńdar da túsiniksiz.

«Qazaqsha bıznes 1,2» (Bıznes po-kazahskıı 1,2)

Rejıseri Jeńisqan Momyshev. Kınonyń birinshi bóliminde Jomart esimdi jigittiń týysqandarymen birlesip kásip bastaýy sýretteledi. Qazaqstanda «qazaqsha bıznes» jasaýdyń tásilderi men bızneske týysqandardyń aralasýy nege ákep soǵatyny baıandalady. Ekinshi bólimde AQSH-qa saıahattaǵan qazaqtardyń shetelde júrse de, óz dástúrin umytpaıtyny kórsetiledi. Fılm 2017 jyldaǵy otandyq kınolardyń ishinde eń kóp  kasalyq jınaq – 299 683 300 teńge jınaǵan.

Nashar fılmder

Sońǵy jyldary otandyq kıno qorjyny komedıa, drama janryndaǵy fılmdermen  tolyǵyp keledi. Kórermenniń óz qyzyǵýshylyǵyna saı fılm kórip, óz erkimen tańdaý jasaýǵa múmkindik týdy.

Qazaqstandyq kınosynshy Kárim Qadyrbaevtyń aıtýynsha, byltyr prokatqa shyqqan qazaqstandyq fılmderdiń kópshiligi «Nashar fılmder» (Zolotaıa malına) qataryna enýi múmkin.

«Majorlar», «Soqyr mahabbat», «Muraǵa qalǵan mahabbat», «Biz Sandyqtaýdanbyz» fılmderin qarap shyqtym, shyn máninde bul fılmderde akterlerdiń oınynan bastap rejıssúra men senraııge deıin problema óte kóp, - deıdi ol.

2017 jyly erekshe belsendi bolǵan rejıserlerdiń TOP-3-tigi

Aqan Sataev

Tanymal qazaq kınorejısseri, prodúser Aqan Sataevtyń sońǵy eki jylda túsirgen týyndylary kórermenniń ystyq yqylasyna bólendi.  Keıingi jyldary onyń  «Reketır 2», «Haker», «Bloger», «Anaǵa aparar jol», «Raıony», «Kásipkerler», «Ol», «Kóshbasshy joly» fılmderi jaryqqa shyqty. Rejıserdiń «Anaǵa aparar jol» atty kınosy «Oskar» syılyǵyna usynyldy, «Raıony» fılmi «Tulpar» ulttyq kıno syılyǵyn aldy.

Rústem Ábdiráshev

Rejıser, senarıst Rústem Ábdiráshev byltyr «Qazaq handyǵy» telehıkaıasyna rejıserlik etti.

Qazaq handyǵyna 550 jyl tolýyna baılanysty túsirilgen «Qazaq handyǵy» týyndysy 2017 jyly 5 qańtarda jalpyulttyq prokatqa shyqty. Osy attas tolyqmetrli kórkem fılm qazaqstandyq prokatta 72 mıllıon teńgeden astam qarjy jınady. Rejıserdiń otandyq, halyqaralyq marapaty óte kóp.

Asqar Uzaqbaev

Qazaqstandyq tanymal rejıser byltyr «91», «Glamýr dlá dýr», «Qazaqqa ǵashyq bolmaýǵa 5 sebep», «Kelin de adam» fılmderin túsirdi. Onyń bul kınokartınalary qoǵamda qyzý talqyǵa salyndy.

Otandyq kınodaǵy jańa «kelbet»

Qazaqstandyq kıno salasyndaǵy jańa esimder qataryna Rashıd Súleımenovtyń rejıserlik etýimen túsirilgen «Perishteler uıyqtap jatqanda» fılmindegi basty róldi somdaǵan Juldyz Ábdikárimovany jatqyzýǵa bolady. Buǵan deıin eshbir jerde boı kórsetpegen Juldyz Ábdikárimovaǵa osy týyndydan keıin  onyń akterlik sheberligi týraly biraz syn da, maqtaýlar da aıtyldy.

Sonymen birge  "Qazaq arýy" hıkaıasynda basty rólderdiń birin somdaǵan Gúlzada Turlash jáne «Alaý» tobynyń ánshisi Erjan Muqataevtyń «Qozy Kórpesh Baıan sulý» kópserıaly hıkaıasyndaǵy oıyndary talaı áńgimege arqaý boldy. Darhan Sárkenovtyń rejıserligimen jaryqqa shyqqan týyndynyń jeli qoldanýshylarynyń qatań synyna ushyrady.

Rejıser Satybaldy Narymbetov «otandyq rejıserler patrıot emes, olar óz qaltalaryn oılaıdy» deıdi. Bul da shyndyqqa janasady.

Qazaq kınolarynyń kópshiligine tán kemshilik – kartınada kásibı akterlerdiń oınamaýy, reıtıń úshin tanymal juldyzdar men ánshilerdiń basty rólderdi somdaýy. Kásibılik bolmaǵan soń akter oıynyn shynaıy  qabyldaý óte qıyn. Senarıdegi sózder jattandy, orfografıalyq zańdylyqtar boıynsha aıtylady, jargon, dıalekt sózder qoldanylady. Bul fılmniń sıqyn ketiredi.

Otandyq kıno salasyndaǵy taǵy bir  úlken kemshilik – fılmderdiń qazaqsha dybystalmaýy. Qazaq aýdıtorıasy otandyq týyndylardy «shala qazaqsha» tilde kórýge májbúr.

Árıne, qazaqstandyq ónimderdi qoldaý kerek, nasıhattaý kerek, biraq ol úshin ónim de sapaly bolýy kerek dep esepteımiz. Shubar tilde, batystyń stılinde túsirilgen, qazaqtyń ıisi sezilmeıtin, akterleri jattandy sóıleıtin fılmdi kórermenge usynýdyń ózi qylmys sıaqty.