Isi qazaqqa tanymal Imanǵalı Tasmaǵambetovtyń Astana qalasyna ákim bolyp taǵaıyndalǵanyna ekinshi jyl bolatyn. Men ol kezde elordanyń irgesindegi «Prıgorodnyı» kentinde turatyn edim. «Qala ákimi halyqqa jyl saıynǵy esebin jasaıdy» eken degen habardy estı sala sol kezdegi «Kongrres hol» saraıyna el-jurtpen birge men de bardym.

Imanǵalı Nurǵalıuly aldymen elordanyń áleýmettik-ekonomıkalyq ahýaly men alda atqarylatyn jumystar jaıynda jan-jaqty baıandapótti. Al, odan keıin jınalǵan halyq tarapynan qoıylǵan suraqtarǵa jaýap berdi. Sol suraq qoıǵan kisilerdiń arasynda men turatyn «Prıgorodnyı» kentiniń bir turǵyny da boldy. Ol qala ákimine atalmysh kenttegi kóshe men turǵyn úıler irgesindegi julym-julymy shyqqan aǵashtar jaıyn qozǵady. Astana astana bolǵaly eshqandaı kútim kórmegen ondaǵy keıbir aǵashtar adam ómirine qaýip tóndirip turǵanyn da ádemi jetkizdi. Onyń bul oryndy kótergen máselesin muqıat tyńdaǵan Imekeń zalda otyrǵan bir orynbasaryn ornynan turǵyzdy da «Myna máseleni dereý sheshińder» dep tapsyrma berdi. 

Óz basym, bul jınalystyń sońyna deıin bola almadym. Ózim turatyn kent jaqta jeke sharýam shyǵyp qaldy da, sol jaqqa qaraı jol tarttym. Endigi qyzyqty qarańyz, jol boıynda «Prıgorodnyı» kentine qaraı kósh túzegen qalanyń kógaldandyrý basqarmasynyń birneshe kóligin kózim shalyp qaldy. Onda kóliktiń neshe túri bar, tipti joǵaryǵa kóteretin satysy bar «Kranǵa» deıin. Buǵan jumysshylar jaıǵasqan eki-úsh júk kóligin de qosyńyz. Ne kerek, bulardyń «bes qarýy túgel». Olar dittegen jerine jete salysymen kent ishindegi aǵashtardy otaýǵa bel sheshe kirisip ketti. Nesin jasyraıyn, men jeke sharýamdy jıyp qoıyp, álgi jumysshylardyń áreketin kóp ýaqyt tamashalap turdym. Tasmaǵambetovtyń bergen tapsyrmasynyń izbe-iz oryndalyp jatqanyna qatty tań qaldym hám tamsandym. Ózderińiz oılap qarańyzdarshy, tapsyrma jınalys kezinde berildi. Sol berilgen tapsyrma jınalys júrip jatqan ýaqytta júzege asyp jatyr. Mine, naǵyz istiń adamy dep osy kisini aıtýǵa bolady. Sózi men isi tarazy basyn teńestirip tur. Muny bir deńiz.

Ekinshi, bizdiń kenttegi jumys munymen bitken joq. Toz-tozy shyqqan kósheleri túzeldi. Turǵyn úılerdiń barlyq aýlasyna kúrdeli jóndeý jumystary júrgizildi. Qysqasy, bir jyldyń ishinde kent kelbeti adam tanymastaı ózgerdi. Shaǵyn sulý kentke aınalyp shyǵa keldi. Eger senbeseńiz men sóz etken kentke arnaıy baryp, bir serýendep kórińizshi. Sondaǵy jergilikti turǵyndardan kenttiń keshegisi men búginin suraýdy da umytpańyz. Tasmaǵambetovtyń kezinde qyrýar tirlik jasalǵanyn jyr qylyp aıtyp beretinine tıtteı de kúmánim joq.

Erlibaı Ózbekbaıulynyń feısbýk paraqshasynan alynǵan