Aspan aptap,

Jer – tozaq,

Aı qap-qara,

Bir ýys bop tarylyp baıtaq dala,

Bir qorqynysh, bir úreı boıdy bılep,

Terezeme qaraımyn jaılap qana.

Nege úrkemin, apyr-aý, jata turmaı,

Kúnám joq ed qorqatyn, qashatyndaı.

Keldi áne! Keýdemmen basa qaldym,

Bir albasty esikti ashatyndaı.

Qara pále tisi appaq, kózi qyzyl,

Betin japqan shashy da, ózi de uzyn,

Qarq-qarq kúlip, kúrkirep sóılep ketti,

Dúrsildegen keýdemniń sezip únin:

«Qyryqqa kep esh jyny basylmaǵan,

Júr, ketemiz, sorly ishkish, aqyn balam! –

Dep álgi eles tónip kep tartqylaıdy. –

Oıatpa, júr, uıyqtasyn qatyn-balań».

Jan qysyldy, halim joq, qaýqarym joq,

«Til baılanyp basymdy shaıqadym tek,

Jata qalyp jabystym etegine, –

Endi ishpeımin shyn aıtam»,  aıtamyn, – dep.

Eki kózi ot shashyp úkideıin,

Dedi bylaı, bar túgi tikireıip:

 – Ózin ózi qorlaǵan sen baıǵusty

Dep kelip em dál búgin bitireıin.

Kórdim endi,

Baryńdy bir aqtardym,

Ish, beıshara, sol bolsa bulaq-balyń!» –

dedi daǵy álgi eles kete berdi,

Men es-tússiz esikte qulap qaldym.

Myrzan KENJEBAI