Qazaqstan Prezıdenti «Nazarbaev Zıatkerlik mektepteri» derbes bilim berý uıymynyń basqarma tóraıymy Kúlásh Shámshıdınovany qabyldady, dep jazady Qamshy.kz aqparat agenttigi Aqordanyń málimetine súıenip,

Kezdesý barysynda Nazarbaev Zıatkerlik mektepteri qyzmetiniń negizgi nátıjeleri men olardyń damý perspektıvalary talqylandy.

Memleket basshysy elimizdiń orta bilim berý júıesinde Nazarbaev Zıatkerlik mektepteri erekshe ról atqaratynyn atap ótti.

– Bul mektepter barlyǵyna úlgi bolýy kerek. Biz olardyń tájirıbesin jańa mektepter ashatyn kezde eskeretin bolamyz. 2008 jyldan beri Zıatkerlik mektepterdi 5660 oqýshy bitirdi. Olardyń barlyǵy da úsh tildi erkin meńgergen. Biz búkil elge Qazaqstanda úsh tilde bilim alý qoldan keletin is ekenin kórsettik, – dedi Elbasy.

Kúlásh Shámshıdınova Nursultan Nazarbaevqa Zıatkerlik mektepterdiń oqytýshy quramyn qalyptastyrý maqsatymen júrgizilgen jumystar jóninde málimdedi.

– Osy jyldar ishinde Sizdiń qoldaýyńyzdyń arqasynda kóptegen jumys atqaryldy. Bizde 2800 muǵalim jumys isteıdi. Olardyń 195-i – sheteldik oqytýshylar, 183-i – «Bolashaq» halyqaralyq baǵdarlamasy boıynsha sheteldiń jetekshi oqý oryndarynda jáne Nazarbaev Ýnıversıtetinde bilim alǵan túlekter. Búginde bizde 4 doktor, 22 ǵylym kandıdaty jáne 719 magıstr sabaq beredi, – dedi K.Shámshıdınova.

Sonymen qatar bilim berý mekemesiniń basshysy oqýshylar kontıngentin qalyptastyrý konkýrstyq negizde júzege asyrylatynyn jáne tek úmitkerlerdiń qabiletterine baılanysty anyqtalatynyn aıtty.

Kezdesý sońynda Elbasy Zıatkerlik mektepter júıesin odan ári damytý jóninde birqatar naqty tapsyrma berdi.