«Árkim tek ózin ǵana oılaıdy». Keshe Astana qalasy ákimi Áset Isekeshevtiń eseptik kezdesýin kórip osyndaı oı túıdim.

Kezinde bireý toıǵanynan, bireý tońǵanynan úlesker atanyp, aqshalaryn óz qoldarymen qurylysshylarǵa sanap bergende, memleketten kepildikti qoıyp, keńes te suramaǵan. Sol adamdar búgin salynbaǵan úılerin memleket salyp bersin, qoldy bolǵan qarjysyn memleket qaıtaryp bersin dep shýlap júr. Syrt kóz músirkep qaraýy múmkin. Al máseleni biletinderdiń olarǵa kózqarasy múlde bólek.

Ózara kelisimge kelmeı, altybaqan alaýyz bolǵan «Azbýka jılányń» úleskerleri qalany qoıyp, eldiń qutyn qashyryp boldy. Olardyń áńgimesine qazir jýrnalıser de aralasqysy kelmeıdi. Bitpes daý, bitispes janjal ekenin biledi.

Astana ákimdigi sol úleskerlermen aptasyna 2-3 márte kezdesý ótkizedi. Sony azsynǵan olar keshe ákimniń eseptik kezdesýinen de qalmady. Baıandama aıaqtala sala ádettegi áýenderine salyp, zaldyń ishin azan-qazan qylyp, shý shyǵardy. Jınalǵan jurt áýelide túsinbeı qaldy da, keıin olardyń «azbýkalyqtar» ekenin bilgen soń, eeee dedi de qoıdy. Óıtkeni olardyń jyry jurttyń yǵyryn shyǵaryp bolǵan.

Ákim qoǵamdyq keńes tóraǵasy Esilovten ruqsat surap, suraq-jaýapty birden solardyń máselesin kezekti «qyrqynshy» ret túsindirýmen bastady.

Elbasynyń tapsyrmasymen úleskerlerdiń máselesin sheshý úshin búdjet qarjysynan 40 mlrd teńge bólingenin de jetkizdi. Tipti solardyń yńǵaıy úshin «Nurly jer» baǵdarlamasyna arnaıy ózgertýler engizip, zańnamalyq turǵyda tıisti sharalardyń júrgizilip jatqanyn aıtty. Búdjetten bólingen qarjy úleskerlerdiki emes, halyqtiki ekenin aıtyp, onyń bir teńgesi de jaıdan-jaı berile salmaıtynyn eskertti. Qazirgi ýaqytta úleskerlerdiń kútken qurylys nysandary tehnıkalyq-qarjylyq saraptamadan ótkizilip jatqanyn, nátıjesine sáıkes tıisti sharalar qabyldanatynyn aıtty. Máseleni sheshý joldaryn útir, núktesine deıin tátpishtep túsindirdi.

Biraq «Azbýkanyń» eshteńege kelispeıtin sanaýly úleskerleri buǵan da qanaǵattanbaı, úırenshikti shýyn jalǵastyrýmen boldy.

Tipti qala turǵyndary eki balam múgedek... ózim múgedekpin... kómekke shynaıy muqtajbyn... balam 700 gram bolyp týdy... sońǵy úmitim sizde...» degen sıaqty ómirdegi basqa túsken qıyndyqtaryn aıtyp jatqanda da «azbýkalyqtar» jurttyń tynyshyn alyp, shýyldaýmen boldy.

Olarǵa tipti ákimniń «ózińnen basqa eshkimdi osylaı qalaı ǵana syılamaýǵa bolady» degeni de áser etpedi. Bir emes, birneshe aqsaqal ortaǵa shyǵyp «aınalaıyn, qyzdarym, qaryndastarym, mádenıet saqtaıyq» dep ótingenin de, «astanalyqtardyń mádenıeti osyndaı bolsa, basqasyna ne ókpe» degen ókpe-renishin de pysqyrmady.

Úleskerler kezdesýdiń ábden shyrqyn ketirgen soń ortaǵa belgili aqyn, Memlekettik syılyqtyń ıegeri Nesipbek Aıtuly shyǵyp, olardy sabyrǵa shaqyryp edi, bolmady. Shýyldaǵandar shýyldaı berdi.

Halqyn da, ákimin de, aqynyn da, aqsaqalyn da, tipti ózderin de syılamaıtyn netken jandar.

Netken mádenıetsizdik, netken ózimshildik, netken keshshelik degennen basqa sóz joq.

Arman Ahmet