Egis naýqany qarsańynda oblys ákimi Amandyq Batalov óńirdegi sharýalardyń qatysýymen qant qyzylshasy óndirisin damytý máselesin talqylaǵan jıyn ótkizdi. Bıylǵy jyly Almaty oblysynda qant qyzylshasynyń alqabyn 11,2 myń gektarǵa ulǵaıtý, odan 414,4 myń tonna ónim jınaý kózdelip otyr, dep jazady Qamshy.kz aqparat agenttigi Almaty oblysy ákimdiginiń baspasóz qyzmetine siteme jasaı otyryp.

Basqosýdy ashqan Amandyq Batalov memleket qoldaýynyń arqasynda birlesken jumystyń nátıjesinde ótken jyly oblystaǵy qant qyzylshasynyń jalpy jıyny 334 myń tonna bolsa, bıylǵy jyly 414,4 myń tonna ónim jınaý mejelengenin aıtty. Oǵan qosa óńdeý máselesi de sheshimin tabýda.

- Sońǵy úsh jylda Kóksý qant zaýytyn tolyq jańǵyrtýdan ótkizdik, sonyń arqasynda onyń óńdeý qýattylyǵy eselep ósti. Qazirgi kezde Aqsý qant zaýytynda jańǵyrtý jumystary júrip jatyr. Bul asa mańyzdy da úlken jumys. Jańǵyrtýdan ótken kásiporyn 1 qazannan jańa qurylǵylarymen óńdeý isin bastaıtyn bolady. Sonymen qatar oblysta sharýalardy aýyl sharýashylyǵy tehnıkalarymen qamtamasyz etý maqsatynda bıylǵy jyly taǵy 7 servıstik-daıyndaý ortalyǵyn quramyz. Sapaly tuqymmen qamtý, jeńildikpen jaǵarmaı berý sıaqty qoldaýlar jalǵasyn tabady, - dedi A. Batalov.

Oblys ákimi jınalǵan qant qyzylshasy tolyq óńdelýi tıis ekenin, ótkizilgen ónim úshin sharýa qojalyqtarymen der kezinde eseptesý kerektigin óńdeýshilerge qarata nyǵyrlaı eskertti.

Munan soń kóktemgi egis naýqanyna daıyndyq barysy týraly oblys ákiminiń orynbasary Serikjan Beskempirov baıandady. Baıandamadaǵy málimetterge súıensek, ótken jyly oblysta 5 servıstik-daıyndaý ortalyqtary qurylyp, 114 aýyl sharýashylyǵy tehnıkalary satyp alynǵan. Sondaı-aq qant qyzylshasynyń 14 myń e.b. fransýzdyq jáne germanıalyq tuqymy alyndy. Jalpy osy maqsattarǵa oblys búdjetinen 1,5 mlrd. teńge baǵyttaldy. Bul baǵyttaǵy jumys jalǵasady. Bıylǵy jyly alǵa qoıǵan maqsattarǵa qol jetkizý úshin 11,5 myń gektar súdiger jer jyrtyldy. Qyzylsha sebetin sharýashylyqtardyń bergen tapsyrystaryna sáıkes oblysta qant qyzylshasynyń 16775 e.b. tuqymy, sonyń ishinde 3480 e.b. memlekettik reestrge 2017 jyly engizilgen shirýge tózimdi «Tısserın» jáne «Igor» jańa gıbrıdtik tuqym satyp alynǵan. Al 7 SDO-ǵa kelsek, olar Aqsý, Alakól, Qaratal, Sarqan aýdandary men Qapshaǵaı qalalarynda quryldy. Bul maqsatqa oblystyq búdjetten 1,7 mlrd. teńge bólingen. 132 birlik aýyl sharýashylyǵy tehnıkalary satyp alynǵan. Qant qyzylshasynyń 1 tonnasyn satyp alý quny ótken jylǵydaı 17 myń teńgeni quraıdy, onyń 8 myń teńgesi zaýyt arqyly, 9 myń teńgesi oblystyq aýyl sharýashylyǵy basqarmasy arqyly sýbsıdıa túrinde tólenedi.

Kezdesý barysynda Kóksý qant zaýytynyń dırektory Altynbek Abatov jáne Aqsý qant zaýtynyń dırektory Murat Tólegenov sóz alyp, kásiporyndardaǵy jańǵyrtý jumystarynyń barysy jaıly aıtyp berdi.

Qant qyzylshasyn ósirýshi sharýalar óz kezeginde qoldaý sharalary úshin, atap aıtqanda, qant qyzylshasyn tastan tazalaıtyn arnaıy tehnıka satyp alýǵa, Sheńgeldi aýyldyq okrýgi aýmaǵynda qyzylsha jınaıtyn alqap jasaýǵa, osy aýdanǵa qant qyzylshasyn tasymaldaýǵa qosymsha KAMAZ satyp alýǵa qoldaý bildirgeni úshin oblys basshylyǵyna rızashylyqtaryn jetkizdi. Sonymen qatar Sheńgeldi aýyldyq okrýginde sýarý júıesine kóńil bólý, nasos stansasyna jańǵyrtý jumystarynyń qajettigi de sóz boldy.

Oblys ákimi árbir máseleniń jiti zerdelenip, qarastyrylatynyn, tıisti qoldaýlar kórsetiletinin aıtty. Ásirese arnaıy tehnıkalar alý, sýarýmen qamtamasyz etý máselesi erekshe nazarda bolmaq.