Kún sanap emes, saǵat sanap jańarǵan ozyq tehnologıalar álemdi úlken ózgeriske ushyratyp otyrǵany baıqalady. Osy oń ózgeristerge barlyq jaǵynan daıyn, ári básekege qabiletti bolýy úshin búginnen bastap orta jáne shaǵyn bıznes ókilderi jaýapkershilikterin túsingeni jón. Elbasy «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty halyqqa arnaǵan Joldaýynda osyny aldyǵa qoıdy. Sondaı-aq, júzege asyrýǵa on jańa mindetti júktegenin bilemiz.
Elimiz álemge beıbitshilik súıgishtigimen tanylyp otyr. Endi sapaly, tabıǵı dárýmenge baı ónimderimen de kózge túse bastaǵany qýantady. Ásirese, aýyl sharýashylyǵy salasyndaǵy áleýetimiz óte joǵary. Elbasy Nursultan Nazarbaev Joldaýynda agroónerkásip keshenin zamanaýı tehnologıamen jabdyqtaýǵa keńinen toqtalsa, buǵan tolyq negiz bar. Óıtkeni, Qazaqstannyń jeri keń-baıtaq, topyraǵy qunarly, klımaty túrli daqyldardy ósirýge óte qolaıly. Biz osy múmkinshilikterdi tolyǵymen ıgerýimiz kerek. Joldaýdyń ereksheligi sol, «Qazaqstanda jasalǵan» degen brendti tez arada qalyptastyrý úshin ne isteý kerektigi naqty mindettermen kórsetilgen.
Jambyl aýdanynda sońǵy jyldary salany damytýda josparly jumystar júzege asyrylyp keledi. Mal basyn asyldandyrý, ónimderin óńdeý qolǵa alyndy. Investorlardyń bastamasymen birshama tyń jumystar júıelengeni qýantady. Áli de dándi-daqyldardy qaıta óńdeý keshenin damytyp, sapaly ónim usynatyn zaýyttar salynsa degen oı keledi. Bul qadamdy bastaý úshin agrarlyq salanyń bilikti mamandaryn daıarlaǵan jón sıaqty. Elbasy tez arada agrarlyq ýnıversıtetterdiń bazasyn qaıta jasaqtaýdy, sóıtip ozyq bilim ortalyqtaryn qurýdy usynǵany tegin emes. «Aqyldy» tehnologıalardy damytýdy mindettegen de utymdy. Bul dala tósindegi san salaly jumystardy adam kúshimen emes, tehnologıanyń ozyq túrleri atqaratyn bolady degen sóz. Qazirgi tańda adam atqaratyn sýarý, dán egý, tyrmalaý, jer jyrtý, tyńaıtý sekildi dala jumystaryna tehnıkany paıdalanǵan jón. Damyǵan elderde bul tájirıbe keńinen qoldanylyp júrgeni belgili.
Qazirgi tańda aýyl sharýashylyǵy dese, kóz aldymyzǵa kún astynda qara jumys istep, terlep-tepship júrgen dıqan elesteıtini jasyryn emes. Jastardyń sanasynda osy túsinik qalyptasqan. Bul Joldaý aýyl sharýashylyǵy baǵytyndaǵy biz atap kórsetken kedergilerdi joıyp, jańa mindetter arqyly álemdik ozyq tehnologıalardy tıimdi paıdalanýǵa úndeıtinimen qundy. İssaparǵa shyqqan saıyn eldi mekenderdegi sharýalaryn shalqytqan eńbek adamdarynyń kúsh-jigerine kóńilim tolady. Olar jer emshegin emip, tórt túlikke qajetti jem-shóp daıyndap, jaz boıy ter tógedi. Al, kúz ben qysta mal bordaqylap, tutynýshyny sapaly et ónimderimen qamtamasyz etedi. Kóktemde dala tósin dýmandy eńbekke bóleıtini taǵy bar. Olar eńbekpen tapqan dúnıeniń qadirin biletinin baıqadym. Buǵan Elbasy Eńbek Eriniń joǵary belgisin tósine qadaǵan kásipker, jerlesimiz Jaqsylyq Úshkempirovtyń qol jetkizgen jetistigi kýá. Olımpıada jáne álem chempıony J.Úshkempirov qazir Myńbaev aýylynda turady. Onyń aýyl turǵyndarynyń áleýmettik-turmystyq jaǵdaıyn, ekonomıkalyq ósýin jaqsartý úshin kóptegen tyńǵylyqty jumystar atqaryp kele jatqany barshamyzǵa málim. Sanaly ǵumyrynyń sońǵy 20 jylyn kásipkerlikke arnaǵan Jaqsylyq Úshkempirovtyń basshylyǵymen Myńbaev aýylynda jasóspirimderdiń salaýatty ómir saltyn ustanyp, sporttyń sambo, dzúdo, boks, fýtbol sıaqty birneshe túrlerimen aınalysýyna múmkindik beretin sport mektebi, úı-kúısiz júrgen otbasylaryn baspanamen qamtamasyz etý úshin 38 bólmeli «Jaqsylyq» jataqhanasy, aýyl búldirshinderiniń mektepke deıingi daıarlyǵyn jetildirýge arnalǵan «Jaqsylyq» balabaqshasy salynyp, kópshilik paıdalanýyna berildi. Bul da atpal azamattyń eline, jerine degen súıispenshiligin, patrıottyq asqaq sezimin kórsetedi. Jaqsylyq aǵanyń «Jaqsylyq» atty sharýa qojalyǵy 1998 jyly qurylǵan bolatyn. Ieligindegi 20 myń gektar jeri, 8000 iri qara maly bar, sondaı-aq egin sharýashylyǵyn da dóńgeletip otyrǵan kásipkerdiń alǵa qoıǵan maqsattary asýda-asý. Joldaýǵa – qoldaý degen osy ǵoı. Áli de onyń bıik belesin baǵyndyratyndar qatary kóbeıse degen tilek te oıyma oralady.
Maıra Aldabergenova
