Búgin Parlament Májilisinde «Jekeshelendirýdi júzege asyrý barysy týraly» taqyrybynda QR Ulttyq ekonomıka mınıstri Tımýr Súleımenovtyń qatysýymen úkimet saǵaty ótýde, dep jazady Qamshy.kz aqparat agenttigi.

Mınıstr Súleımenov jekeshelendirý isine qatysty óziniń baıandamasynda 90-shy jyldardyń basynda jekeshelendirýdiń birinshi tolqyny bolǵanyn atap ótti.

«Memlekettik menshikti ózgertý jáne ony jekeshelendirý prosesiniń 90-shy jyldardyń basynda bastalǵany barshańyzǵa málim. Bul kezeńdi jekeshelendirýdiń «birinshi tolqyny» dep ataýǵa bolady.

«Birinshi tolqynnyń» túıindi mindeti jeke bıznesti damytý úshin naryqtyq ekonomıka men bazalyq sharttardy jasaý bolyp tabylady. Bul baǵdarlama sheńberinde 43 myńnan astam memlekettik menshik obektileri jekeshelendirilip, kirister shamamen  360 mlrd. teńgeni qurady.

90-shy jyldardaǵy jekeshelendirý naryqtyq ekonomıkanyń myqty irgetasyn qalyptastyrýǵa, jeke bastama men menshiktiń nyǵaıa túsýine múmkindik berdi», - dedi mınıstr.

Onyń aıtýynsha, búgingi kúnge deıin memlekettik sektor el ekonomıkasynyń edáýir bóligin alady. Qarjy jáne adamı resýrstar úshin kvazımemlekettik sektormen teń emes básekelestik jaǵdaıynda jekemenshik kásiporyndardyń odan ári damýy qıyndaýy múmkin ekendigin de aıtyp ótti.

«Memlekettik organdar elimizdiń basshylary bergen árbir tapsyrma, mindetter boıynsha uıymdar qurady, bul kvazımemlekettik sektor sýbektileri sanynyń ósýine, qyzmettiń qaıtalanýyna alyp keledi jáne tutastaı alǵanda el búdjetiniń júktemesi ulǵaıady.

Eger kvazımemlekettik sektor sýbektileriniń 2010 - 2014 jyldar aralyǵyndaǵy ósý serpinin taldaıtyn bolsaq, jyl saıynǵy ósim ortasha eseppen 5% qurady jáne 2014 jyldyń sońyna qaraı onyń sany 7,7 myńnan astam boldy.

Nátıjesinde, básekelestikti jáne jeke bıznesti damytý, el ekonomıkasynyń salalaryn jańǵyrtý jáne damytý úshin ınvestorlardy tartý maqsatynda Memleket basshysy Úkimettiń 2014 jylǵy 14 aqpandaǵy keńeıtilgen otyrysynda aýqymdy jekeshelendirý júrgizý arqyly memlekettiń ekonomıkadaǵy úlesin Ekonomıkalyq yntymaqtastyq jáne damý uıymy elderiniń deńgeıine deıin, ıaǵnı jalpy ishki ónimniń 15%-na deıin qysqartý mindetin qoıdy», - deıdi Tımýr Súleımenov.