Reseıdiń Kemerovo qalasyndaǵy órtten qurban bolǵandar sany sońǵy derekter boıynsha 48 adamǵa jetken. 40-tan astam adam jaralanǵan. 70-ke jýyq adam iz-túzsiz joǵalǵan, onyń kópshiligi – balalar, dep habarlaıdy RIA Novostı.

Zardap shekkenderdiń biri órtten qashyp, úshinshi qabattan sekirip ketken.

Máskeý ýaqyty boıynsha 26 naýryzǵa qaraǵan túni «Zımnáá vıshná» saýda ortalyǵynda, kınoteatr men balalardyń oıyn alańdary ornalasqan tórtinshi qabatynda órt shyqqan.

Tótenshe jaǵdaı qyzmetkerleri órtengen nysannyń áli tútindep jatqanyn aıtady.

Órttiń neden tutanǵany ázirshe belgisiz. Órt shyqqan kezde ǵımaratta bolǵan 200-ge jýyq adam syrtqa shyǵarylǵan. Zardap shekkenderdiń biri órtten qashyp, úshinshi qabattan sekirip ketken.

Kýágerlerdiń aıtýynsha, órt shyqqan kezde dabyl berý júıesi jumys istemegen. Tergeý komıteti turǵyndardyń mert bolýyna baılanysty qylmystyq is qozǵady. Kemerov oblystyq prokýratýrasy da órt oqıǵasyn tekserýdi bastaǵan.