Almatyda qalanyń kórkin buzǵan suryqsyz garajdar súrilip jatyr.

Almatyda qalanyń kórkin buzǵan suryqsyz garajdar súrilip jatyr. Óıtkeni, qoımalardyń kóbisi ıesiz qalǵan. Al ózderin «kólikjaıdyń qojaıynymyz» dep tanystyratyndardyń qolynda tıisti qujaty joq. Tazalyq saqshylary bir ǵana Áýezov aýdanynan 200-den astam eskirgen temir garajdy anyqtapty. Endi ekologtar kóp kúttirmeı, olardyń barlyǵyn buzyp tastamaq.

İshi-syrty tot basyp, ábden tozyǵy jetken bul temir garajdar kezinde eńbek jáne soǵys ardagerlerine berilgen. Qazir qoımalar qaraýsyz qalǵan. Biriniń qojaıyndary baıaǵyda qaıtys bolsa, al keıbiriniń ıeleri tastap ketken. Endi ekologtar bul garajdardy súrip tastaýǵa nıettenip otyr. Óıtkeni, suryqsyz kólikjaılar qala kórkin buzǵany óz aldyna, qobyrsyǵan qoqystyń ordasyna aınalyp ketipti. Jaýaptylar «Aqsaı» yqshamaýdanyndaǵy 4 qoımany jermen jeksen etti.

«Bul mańdaǵy garajdar 90-shy jyldardyń basynan beri tur. Qazirgi ýaqytta kóbisiniń ıesi joq. Al qoımalardy jalǵa alýshylardyń tıisti qujattary joq. Barlyǵyn tekserip, shetinen buzyp jatyrmyz. Óıtkeni, garajdar qalanyń kórkin ketirip, aınalasy qoqysqa tolyp ketken»,-dedi Almaty qalasy áýezov aýdany ekologıa bóliminiń basshysy Ǵalıa TÓLEGENOVA.

Jergilikti turǵyndar suryqsyz garajdardyń súrilýin asyǵa kútken eken. Olar qaraýsyz qalǵan qańyltyrlar panasyz qańǵybastardyń mekenine aınalǵaly talaı ýaqyt boldy desedi.

Qala kórkin buzǵan ıesiz garajdardy súrý jumystary búkil qala aýmaǵynda júrgizilmek. Bir ǵana Áýezov aýdanynda  200-den astam eskirgen temir qoıma bolsa, ekologtar eki apta ishinde olardyń 14-in buzǵan. Qalǵany jyl sońyna deıin joıylady.