QR Din isteri jáne azamattyq qoǵam vıse-mınıstri Berik Aryn bastaǵan qazaqstandyq delegasıa BUU shtab-páterinde (Nú-Iork qalasy) uıymdastyrylǵan aǵymdaǵy jylǵy qazanda Astana qalasynda ótkiziletin Álemdik jáne dástúrli dinder lıderleriniń VI sezine arnalǵan «Qaýipsiz álem úshin dinder lıderleri» taqyrybyndaǵy Arrıı formýlasy boıynsha BUU Qaýipsizdik Keńesiniń otyrysyna qatysty dep jazady Qamshy.kz aqparat agenttigi. 

İs-shara BUU Órkenıetter Alánsymen birlese otyryp Qazaqstan Respýblıkasynyń Birikken Ulttar Uıymynyń janyndaǵy Turaqty Ókildigimen uıymdastyryldy.

BUU Órkenıetter Alánsynyń Joǵary ókili Nasır Ábdel Ázız An-Naserdyń jáne BUU janyndaǵy Qazaqstan Respýblıkasynyń Turaqty ókili   Qaırat Omarovtyń tóraǵalyq etýimen ótken forýmǵa BUU Qaýipsizdik keńesine múshe memleketterdiń, úkimettik emes uıymdardyń ókilderi, «Dinder beıbitshilik úshin» dúnıejúzilik konferensıasynyń Bas hatshysy Ýılám Vendlı, BUU janyndaǵy Dinı úkimettik emes uıymdary komıtetiniń prezıdenti Svamı Parameshananda, «Ist park Sınagog» dinı kóshbasshysy Ravvın Artýr Shnaıer jáne basqalary qatysty.

Atalmysh otyrys BUU Órkenıetter Alánsynyń Joǵary ókili Nasır Ábdel Ázız An-Naserdiń BUU Bas hatshysy Antonıý Gýterrıshtyń atynan is-sharaǵa qatysýshalarǵa arnalǵan quttyqtaý sózimen ashyldy.    

QR Din isteri jáne azamattyq qoǵam vıse-mınıstri – Sıeziń maqsattary men mindetterin ilgeriletý jónindegi ýákili Berik Aryn QR Parlamenti Senatynyń Tóraǵasy, Álemdik jáne dástúrli dinder lıderleri sezi hatshylyǵynyń basshysy Qasym-Jomart Toqaevtyń atynan prezentasıalyq baıandamamen sóz sóıledi.   

B. Aryn qatysýshylardy Qazaqstannyń etnosaralyq jáne konfesıaaralyq kelisimdi qamtamasyz etýdegi tájirıbesimen tanystyra otyryp, BUU jáne basqa da halyqaralyq uıymdardyń mısıasymen jáne basymdyqtarymen úndesken Álemdik jáne dástúrli dinder lıderleriniń sezin shaqyrý boıynsha Prezıdent N.Á.Nazarbaevtyń jahandyq bastamasy týraly tolyq aıtyp berdi.

Atap aıtqanda, vıse-mınıstr óziniń 15 jyldyq tarıhynda Sıez  árqashan kúrdeli jahandyq prosesterdiń shyńynda ótkizilgenine nazar aýdardy. Búgingi jaǵdaıda halyqaralyq qatynastarǵa degen senimdiliktiń  tapshylyǵy, jańa syn-tegeýrinder men men qaýip-qaterlerdiń, jergilikti soǵystar men álemniń birneshe óńirlerindegi radıkaldy qozǵalystardy jandandyrýdyń paıda bolýyna baılanysty jáne álemdegi qaýipsizdik pen turaqtylyqty qamtamsyz etý jolynda dinı lıderler men álemdik saıasatkerlerdiń kúsh-jigerin biriktirý qajettigi boıynsha másele óte ózekti ekendigi týraly aıtyldy.

Osyǵan baılanysty BUU múshe-memleketter jáne halyqaralyq uıymdar tarapynan jahandyq deńgeıde dinaralyq dıalogty ilgeriletý isine kúsh-jiger úlesin qosýǵa múmkindik beretin atalǵan forýmnyń jumysyna belsendi qatysýlary arqyly Memleket basshysymyzdyń  bastamasyn keńinen qoldaýǵa úmit artatynyn bildirdi.

Jalpy, is-sharaǵa qatysýshylar Qazaqstannyń belsendi syrtqy saıasatyn joǵary baǵalap, kún tártibindegi jahandyq ózekti máselelerdi talqylady, onyń ishinde Álemdik jáne dástúrli dinder lıderleriniń aldaǵy VI seziniń mazmundyq bóligi boıynsha qundy keńester men usynystar berildi. Sondaı-aq, qatysýshylar dinaralyq dıalogty ilgeriletý boıynsha da óz elderiniń tájirıbesimen jáne dinı ekstremızm men terorızm problemalaryn sheshý, beıbit jáne turaqty qoǵam qurý jónindegi ózderiniń kózqarastarymen bólisti.

«Arrıı formýlasy» boıynsha otyrystar beıresmı túrde ótkiziledi. Olar BUU QK múshelerine ıkemdi rásimder negizin paıdalana otyryp, ashyq túrde pikir almasýǵa múmkindik beredi. Otyrystyń osyndaı formaty Venesýela elshisi Dıego Arrııdiń qurmetine atalǵan, ol bul praktıkany 1992 jyly BUU Qaýipsizdik keńesinde Vensýela ókili retinde qoldanǵan bolatyn (1992–1993 jyldary).

Sonymen qatar, issapar sheńberinde vıse-mınıstr B.Arynnyń  «Dinder beıbitshilik úshin» dúnıejúzilik konferensıasynyń Bas hatshysy Ýılám Vendlımen jáne BUU Órkenıetter Alánsynyń Joǵary ókili Nasır Ábdel Ázız An-Nasermen ekijaqty kezdesýleri ótkizildi.

Kezdesýlerde B.Aryn Sıez Hatshylyǵynyń Basshysy, QR Parlamenti Senatynyń Tóraǵasy Q.Toqaevtyń atynan VI Sezge qatysý úshin shaqyrý hattaryn tabystap, suhbattastardy aldaǵy forýmnyń kún tártibimen tanystyrdy, sondaı-aq Qazaqstannyń  «Dinder beıbitshilik úshin» uıymymen jáne Órkenıetter Alánsymen yntymaqtastyǵyn damytý máselelerin talqylady.

Ý. Vendlı jáne N. An-Naser shaqyrýdy rızashylyqpen qabyldap, Sıez jumysyna ózderiniń qatysatyndyqtaryn jetkizdi.