Almatylyq qarttar kıeli jerlerdi aralamaq. Tipten, Medeý aýdanynyń bir top zeınetkerleri demeýshilerdiń arqasynda Sharyn shatqalyn sharlap qaıtqan. Al Áýezov aýdanynyń aqsaqaldary men aq jaýlyqty analary Astananyń 20 jyldyǵynyń qurmetine konsert ótkizbek. Almatylyq qarttar ózderine arnap ashylatyn áleýmettik 40 klýbty taǵatsyzdana kútip júr. Óıtkeni «Belsendi uzaq ómir» atty jol kartasynyń jobasy aıasynda  ashylatyn ortalyqtar zeınetkerlerdi zeriktirmeı, kómekke zárý jandarǵa jan-jaqty qoldaý kórsetedi.

Tyl ardageri Kúlbadan apa álide tyń. Seksenge jaqyndap qalǵan qart ana qarap otyrmaı, zamandastaryna kómektesedi. Ardagerler uıymynyń bir bólimine jetekshilik etetin zeınetker qurbylarymen syrlasyp qana qoımaı, ár qaısysynyń jaǵdaıyn bilip, mereke, týǵan kúnderde quttyqtaý sharalaryn uıymdastyrady.

«Bımen aınalysady, sportmen aınalysady. Árqaısysynyń óz jumysy bar. Menzeınetkerlermen, tyl ardagerlerimen jumys isteımin. Án aıtamyz», - dedi  tyl ardageri  Kúlbadan Qonysbaeva.

Qala kóleminde 222 myńnan astam zeınetker bolsa, olardyń 45 myń 500-i Áýezov aýdanynda. Qartty kóp aýdannyń qarttary da qarbalasyp, ózderiniń is-josparlaryn jasaýdan qoldary bosamaıdy. Júzý, gımnastıka, bılárd  syndy sporttar myna adamdar úshin tańsyq emes. Tigin, toqyma syndy jas kezderinen jandaryna serik bolǵan ıne, bizdi búginge deıin tastamaǵan.  

«Oqta-tekte osynda kelip, bıge baramyz. Bulardyń shaqyrǵan jerinen qalmaımyz. Ár ýaqytta kerekti jerine baryp turamyn. Ýaqytymyz jaqsy», - dedi UOS ardageri Jańbyr Kerimqulov. 

Shejireshi, úlgi-ónegeniń, tálim-tárbıe,  kóregendik pen meıirimdiliktiń mol qazynasy sanalatyn aýdan qarttary aldaǵy ýaqytta tarıhı, kıeli jerlerdi aralamaq. Aldaǵy aptada olar Astananyń 20 jyldyǵyna arnap zamandastaryna konsert ótkizedi.

«Men buny óte jaqsy ıdeıa, baǵdarlama dep sanaımyn. Kóptegen qarttar zeınetke shyqqan soń, qaıda baratyndaryn, ne isteıtinderin bilmeı jatady. Eger ortalyq ashylsa, ishteri pyspaı, densaýlyqtaryda jaqsy, oılary sergek bolar edi. Klýbtar árbir aýdanǵa kerek», - dedi Almaty qalasy Áýezov aýdandyq ardagerler keńesiniń tóraıymy  Bátıma YBYRAEVA.  

Ardagerler keńesine qarasty qarttar klýby kóp bolmasada jumys istep turǵandary bar. Medeý aýdanyndaǵy  «Sharaına» klýbynyń músheleri Sharyn shatqalyn aralap kelse, aldaǵy kúnderi  tarıhı oryndarǵa taǵy barmaq. Al «Úmit» ortalyǵynda qolónershi qarttar toptasqan. 

«Bulardyń kópshiligi ǵalym adamdar, úlken qyzmet istegen adamdar. Sóıleıtin, ómirden qorytyndy jasaıtyn adamdar. Myna, balalarǵa tárbıe berý úshin, ana kórgen bilgenderiniń bárin aıtyp berý úshin bulda sebepker bolady dep uıymdastyryp jatyrmyz», - dedi Almaty qalasy Medeý aýdandyq soǵys jáne eńbek ardagerleri keńesiniń tóraǵasy  Kım Serikbaev.  

Almaty halqynyń 12 paıyzyn quraıtyn qarttarǵa kómek kórsetý - memleket basshysynyń «Bes áleýmettik bastamasy» aıasynda qolǵa alynady. Jobany júzege asyrý barysynda «Belsendi uzaq ómir» ortalyǵy qurylady. Árbir ortalyqta kitaphana, fıtnes zal,  emdik ıoga, aerobıka, shahmat, toǵyzqumalaq, domıno jáne basqa da úıirme zaldar jumys isteıdi. Tipten, erinbese  kompúter, til kýrstaryn oqımyn degen zeıindi zeınetkerlerge de múmkindik  jasalady.