«Rýhanı jańǵyrý»  ortalyq jobalardy basqarý keńsesinde «Toǵyz áýlıe» zıratyna birinshi ekspedısıa jasaý týraly sheshim qabyldandy, dep habarlaıdy Qamshy.kz aqparat agenttigi İshki saıasat basqarmasynyń baspasóz qyzmetine silteme jasap.

Óńir boıynsha jobalyq keńseniń usynýymen mamyr aıynda Aqmola oblysynyń mádenıet basqarmasy, «Kıeli Qazaqstan» ǵylymı zertteý ortalyǵy jáne ortalyq saraptama keńesiniń múshelerinen jasaqtalǵan arnaıy top Qazaqstandaǵy qasıetti mekenderdiń tizimine «Toǵyz áýlıe» zıratyn da qosý úshin birinshi zertteý ekspedısıasyna attanatyn boldy.

Elbasy Nursultan Nazarbaev óziniń «Bolashaqqa baǵdar: Rýhanı jańǵyrý» baǵdarlamalyq maqalasynda arnaıy jobalardyń biri retinde «Qazaqstannyń kıeli jerleri» jobasyn atap ótti. Sózsiz ol – mádenıetti, ózindik ulttyq kodty saqtaý úshin.

Patrıotızmniń eń mańyzdy belgisi – týǵan jerine, mádenıetine, salt-dástúrine degen erekshe kóńildi qalyptastyrý. Qazaqstandaǵy eskertkishterdi, ǵımarattardy, qurylystardy qalpyna keltirip qana qoımaı, qasıetti mekenderdi ulttyń sanasyna birtutas kıeli uǵym retinde sińire alý. Osyndaı topqa qosýǵa bolatyn Qazaqstandaǵy qasıetti mekenniń biri – Astanadan 150 shaqyrym jerdegi «Toǵyz áýlıe» zıraty. Ol jerde qazaq dalasynyń belgili aǵartýshylary men qaıratkerleri jerlengen. Olardyń bári – ulttyq sana-sezimniń oıaný kezinde ómir súrip, eńbek etip, dinı taqyrypqa qurmet kórsetken qazaq zıalylarynyń ókilderi. Sondaı-aq, ıslamnyń rýhanı-zıatkerlik mektebi – tasaýf (sopylyq jolyn) ustanǵan, sonyń kómegimen qazaqtar ıslam dinin qabyldaǵan. Osy ejelgi «Toǵyz áýlıe» zıratynda otyzǵa jýyq qajylar men óz zamanyndaǵy belgili ǵalymdar jáne birneshe ret qajylyqqa barǵan er adamdar jerlengen. Sonyń biri – Aqmola okrýginiń aǵa-sultany Ibrahım-qajy Jaıyqbaı. Olardyń ishinde, osy ýaqytqa deıin halyqqa belgisiz: Janbatyr-haziret, Qutan-haziret, Aldajar-haziret, Jantas-haziret, Áltá-haziret, Musa-haziret, Qurandy jatqa bilgen Shernıaz-qarı, Nurtaza-haziret, Sadýaqas-haziret, Sopy-Kópeı-haziret, Baqbergen-haziret jáne basqalar.