QR Densaýlyq mınıstri E.Birtanovtyń,

Almaty qalasy ákimi B.Baıbek myrzalardyń nazaryna!

Almaty qalalyq densaýlyq saqtaý basqarmasynyń basshylyǵyna Serikbol Mýsınov taǵaıyndalǵaly beri bas dárigerlerdiń basyna qara bult úıirildi. Alǵashynda ol densaýlyq saqtaý salasynyń damýyna erekshe úles qosqan, medısına ǵylymynyń doktory, profesor, Almaty qalasy máslıhatynyń depýtaty, №7 qalalyq klınıkalyq aýrýhananyń bas dárigeri Marat Abdýllaevty jumystan bosatty. Odan keıin Almatydaǵy Perınatologıa jáne balalar kardıohırýrgıasy ortalyǵy bas dárigeri Elmıra Jaqasheva da qyzymetinen ketti. Endi mine, ol qalalyq onkologıa ortalyǵynyń bas dárigeri Damır Dáýletbaevqa da tisin batyryp, zańsyz jumystan shyǵaryp otyr.

Aýyzsha shaǵymnyń qudireti 

Oqıǵa bylaı bolǵan. 2018 jyldyń 3-qańtarynda jumys ýaqyty bitken soń keshki saǵat 20.00-de Damır Dáýletbaevty Almaty qalalyq densaýlyq saqtaý basqarmasy basshysynyń orynbasary Nurjan Isabekov kabınetine shaqyrady.

Ol bas dárigerden naýqas E.Ýsatovanyń aýyzsha bildirgen (jazbasha emes) shaǵymyna baılanysty jazbasha túsinikteme berýin talap etedi. Nurjan Amangeldiulynyń aıtýynsha, 2018 jyldyń 3-qańtarynda Almaty onkologıa ortalyǵynda emdelýshi E.Ýsatovaǵa dárigerlik qabyldaý kezinde №30 emhananyń aýdandyq onkology Mıra Muhambetjanova men onyń meıirbıkesi D.Tohanova dórekitilik tanytqan eken.

Sonymen birge D.Tohanova E.Ýsatovaǵa A4 qaǵazy men is-qaǵazdaryn bekitip qoıatyn papka jáne qalam ákelýin ótingen kórinedi.

Osylaısha densaýlyq saqtaý basqarmasy basshysynyń orynbasary N.Isabekov bas dárigerden E.Ýsatovanyń sózine qaraı oryn alǵan mán-jaılarǵa baılanysty túsinikteme daıyndaýyn suraıdy.

Basshylyq buıyryp talap etkennen keıin Damır Dáýletbaevtyń túsinikteme jazýyna týra keledi. Onda ol E.Ýsatovanyń aýyzsha bildirgen aryzyna sáıkes qyzmettik tekserý júrgizetinin, sodan keıin ǵana onyń nátıjesi týraly qujattardy usynatynyn jetkizedi.

Negizi, «Jeke jáne zańdy tulǵalardyń ótinishterin qaraý týraly» QR Zańynyń 6 baby 2-tarmaǵyna sáıkes, jeke tulǵanyń ótinishinde – onyń tegi, aty, jeke sáıkestendirý nómiri (ol bolǵan jaǵdaıda), poshtalyq meken-jaıy kórsetilýi kerek.

Ótinishke jeke tulǵanyń ózi nemese zańdy ókili qol qoıýy tıis. Alaıda emdelýshi E.Ýsatovanyń jazbasha túrdegi shaǵymy joqtyǵyna qaramastan, 5-qańtarda Onkologıalyq ortalyqta Naýqastardy qoldaý jáne ishki aýdıt qyzmetiniń jetekshisi Asylbek Emberdıevtyń baıanhaty negizinde tártiptik jáne sybaılas jemqorlyq quqyqbuzýshylyqtyń aldyn alý boıynsha komısıa otyrysy ótedi. Onda E.Ýsatovanyń aýyzsha shaǵymy qaralady. Ol 05.01.2018 jyly №1 hattamamen bekitiledi.

Komısıa sheshimimen aýdan onkology M.Muhambetjanovaǵa naýqastarǵa dóreki qaraǵany úshin eskertý, al medbıke D.Tohanovaǵa óziniń fýnksıonaldyq qyzmetin yqylassyz oryndaǵany úshin sógis beriledi. Budan bólek emhana meńgerýshisi Tólegen Nursilenovke qyzmetkerlerine baqylaý jasamaǵany úshin eskertý jasalady.

Osydan keıin baryp bas dáriger D.Dáýletbaev qalalyq densaýlyq saqtaý basqarmasynyń basshysy Serikbol Mýsınovqa júrgizilgen tekseris týraly jáne kináli qyzmetkerlerge tártiptik jaza qoldaný nátıjeleri jóninde jazbasha túrde habardar etedi.

Osylaısha aýyzsha ǵana shaǵym úshin basqarma basshylyǵynyń talabymen medısınalyq qyzmetkerlerge shara qoldanylady.

Biraq bul sharalar Serikbol Mýsınovke azdyq etse kerek. Ol óziniń №12 buıryǵymen tártiptip jaza retinde bas dárigerge birden qatań sógis beredi.

Qudaı-aý, bul jerde bas dárigerdiń ne jazyǵy bar? Budan da soraqy áreketterge barǵan, búdjet qarajatyn dalaǵa shashyp, tipti Sybaılas jemqorlyqqa qarsy is-qımyl Ulttyq búrosynyń tergeýinen ótken (atyn aıtpaı-aq qoıaıyq) bas dárigerge jaı ǵana eskertý jasalady da, al bir ǵana emdelýshiniń jazbasha da emes, aýyzsha shaǵymyna bola Damır Dáýletbaevqa qatań sógis beriledi. Osy ádiletti me?

Tipti, basqarma basshylyǵy bul qyzmettik jazbany D.Dáýletbaevqa tanystyrmaǵan. Bul rette Onkologıa ortalyǵynyń bas dárigeri oqıǵa boıynsha naýqas E.Ýsatovadan jazbasha túrde shaǵym alynbaǵandyǵyn jáne tolyqqandy tekseristiń bolmaǵanyn aıtyp, qatań sógistiń negizsiz berilgendigin jazbasha túrde málimdegen.

Negizi, QR Eńbek kodeksiniń 64 babyna sáıkes, jumys berýshi jumyskerdiń tártiptik teris qylyq jasaǵany úshin eń birinshi eskertý, ekinshi, sógis, úshinshi, qatań sógis, sodan keıin ǵana baryp tórtinshi, eńbek shartyn buzýǵa, ıaǵnı, jumystan shyǵarýǵa quqyly.

Al bul jerde basqarma basshylyǵy birden úshinshi normany qoldanyp, zańdy belden basyp, «qazanshynyń óz erki qaıdan qulaq shyǵarsa» degendeı, bilgenin istep, bılep-tóstegenin kimde bolsa baıqaıtyny anyq.

Árıne, búkil sanaly ǵumyryn medısına salasyna arnaǵan Damır Dáýletbaev ómirinde qatań sógis almaq turmaq, birde-bir ret eskertý de alyp kórmegen jan.

Tipti, ol negizsiz, zańsyz jumysynan shyǵyp ketip bara jatqanda áriptes  qyzmetkerleri qımaı, eriksiz jylap jibergenderin kórdik. Kóbisi Damır Dáýletbaevty qımaıdy. Onyń ádiletsizdiń qurbany bolǵanyna qynjylýda. Shynyn aıtsaq, onyń adamgershiligine, adaldyǵyna, ádil basshy bolǵandyǵyna ony tanıtyndardyń eshqaısysy kúmán keltirmeıdi.

Kezinde ol №1 qalalyq klınıkalyq aýrýhananyń bas dárigeri bolǵan. Ondaǵy medısınalyq qyzmetkerler de onyń uıymdastyrýshylyq qabileti joǵary, óte ádil basshy bolǵanyn áli kúnge deıin jyr qylyp aıtady.

Bitpeıtin komısıa, taýsylmaıtyn tekserýler dárigerlerdi qajytty

Onyń ústine, 9-qańtarda Almaty qalasy densaýlyq saqtaý basqarmasynyń №2 buıryǵymen Onkologıalyq ortalyqtyń medısınalyq jáne qarjy-sharýashylyq qyzmetine monıtorıń júrgizý maqsatynda komısıa qurylypty.

Bul tekseristiń ádiletsiz, negizsiz ótkendigin Almaty onkologıalyq ortalyǵynyń ujymy alǵa tartyp, zańǵa sáıkes jazbasha túrde densaýlyq saqtaý basqarmasyna túsinikteme jiberdi. Ókinishke oraı, basqarma basshylyǵy bul dáleldemelerdi de jaýapsyz, qaraýsyz qaldyrǵan.

Al 29-naýryzda qalalyq densaýlyq saqtaý basqarmasynyń múgedekterdiń úkimettik emes uıymdary ókilderimen ótken jınalysy barysynda estý qabileti buzylǵan múgedek Elena Mıhaılovnanyń Onkologıalyq ortalyqqa emdeýge jatqyzý, mamandar qabyldaýyna kirý kezegi boıynsha máselesi qaralady.

Bul rette ol emdeýshi dárigerlerge, mamandarǵa, medısınalyq personalǵa, sondaı-aq, emdeý prosesine eshqandaı narazylyq bildirmegen. Tipti, ol bas dárigermen jeke kezdesýinde de dárigerlerge eshqandaı shaǵymy joqtyǵyn rastady. Ol qaıta jazbasha túrde dárigerlerdiń ózine sypaıy qaraǵanyna alǵa tartqan.

Biraq emdelýshi Elena Mıhaılovnanyń kezek týraly jazbasha emes, aýyzsha shaǵymy negizinde Almaty qalasy densaýlyq saqtaý basqarmasynyń basshysy S.Mýsınovtyń №62 buıryǵymen Onkologıalyq ortalyqqa jáne bir tekserý júrgizý úshin komısıa qurylady.

Muny endi bas dárigerdiń sońyna sham alyp túsý dep aıtpasqa lajymyz joq. Áıtpese, dárigerler qaıta naýqastardyń barlyq jaǵdaıyn jasap, óz mindetterin minsiz atqarý sekildi basqa da suraýy kóp jumystarmen aınalysýdyń ornyna bitpeıtin komısıa men tekserýlerge ýaqytyn bólip sabylýǵa májbúr bolǵan.

Budan keıin bizdiń dárigerler qalaı básekege qabiletti bolady, densaýlyq saqtaý salasy qalaı jaqsarady?

Osylaısha 9-qańtardaǵy aldyńǵy №2 buıryq negizinde qurylǵan komısıa sheshimine baılanysty kóterilgen máselelerge obektıvti jáne zańdy qaraýdy qamtamasyz etýdiń ornyna basqarma basshylyǵy bir aıǵa jeter-jetpes 30-naýryzda onkologıalyq naýqastarǵa medısınalyq qyzmet kórsetý sapasyn baǵalaý boıynsha taǵy da komısıa quryp, tekseris júrgizgen.

Alaıda, bul tekserý de óreskel zań buzýshylyqpen ótedi. Buıryq negizinde tekserýge 7 adam bekitilgenimen, shyn mánisinde 16 maman tekseris júrgizgen.

Onyń ústine, qosymsha tekserý quramy, olardyń tekseriske qandaı baǵytta tartylatyndyǵy bas dárigerge aıtylmaǵan.

Tipti, muny Almaty onkologıa ortalyǵynyń qyzmetkerleri ujym bolyp qol qoıyp turyp, tekserý barysynda jiberilgen barlyq quqyqbuzýshylyqtardy egjeı-tegjeıli kórsetip bergen bolatyn.

Degenmen bul ujymdyq ótinishti de qalalyq densaýlyq saqtaý basqarmasynyń basshylyǵy qaraýsyz qaldyrǵan. Sonymen qatar bas dárigerdiń óz dálelderin keltirý úshin birlesken otyrys ótkizý týraly usynysy da elenbepti.

Osydan keıin 20-sáýirde basqarma basshylyǵy Damır Dáýletbaevpen eńbek kelisim shartyn buzý týraly buıryq shyǵaryp, negizsiz jumystan shyǵarady. Qaıta kerisinshe olar qalalyq onkoortalyq ujymynyń eki qyzmettik tekseris nátıjelerine negizdelgen kelispeýshilikterin qaraýdyń ornyna, zańdy belden basyp, qarapaıym dárigerlerdi esinen tandyryp, bas dárigerdiń eńsesin ezip, janshyp tastaıdy.

Qarjy shashqan ósedi, jumysty adal atqarǵandar óshedi…

«Aıtpaıyn deseń de – aıtqyzady, jazbaıyn deseń de – jazǵyzady» demekshi, myna jerde bir shyndyqty ashyp aıtpasaq bolmaıdy.

Osy materıaldy jazar aldynda qoǵamdyq máselelerge únemi belsendilik tanytyp júretin Berik Ádıev aǵamyzben kezdestik. Ol kisi buǵan deıin №1 qalalyq klınıkalyq aýrýhanada Eńbek qorǵaý jáne tehnıkalyq qaýipsizdik ınjeneri bolyp qyzmet istegen-di. Endi sol kisiniń aıtqanyna nazar aýdaraıyq.

– Men Almaty qalasy densaýlyq saqtaý basqarmasynyń basshysy Serikbol Mýsınovtyń bul áreketine narazymyn. Óıtkeni, №1 qalalyq klınıkalyq aýrýhananyń bas dárigeri tenderden bólingen qarajattyń baqandaı 2 mln. 200 myń teńgesin dalaǵa shashty. Muny Sybaılas jemqorlyqqa qarsy is-qımyl Ulttyq búrosynyń Almaty qalasy boıynsha departamenti tekserip, anyqtaǵan-dy.

Tipti, aýrýhana bas dárigerine qatysty shara qoldaný týraly densaýlyq saqtaý basqarmasyna usynys jiberedi. Biraq basqarma basshysy Serikbol Mýsınov oǵan jaı ǵana eskertý beredi de, al óz isin adal atqaryp otyrǵan ımandy, bir emes, eki ret qajylyqqa baryp kelgen Damır Dáýletbaevqa qaıdaǵy bir aýyzsha shaǵym úshin qatań sógis jarıalap, jumystan bosatty. Sonda ádilettilik qaıda?

Men bul máseleni S.Mýsınovtyń qabyldaýynda bolǵanda aıtqanmyn.

Ol: «maǵan ne isteý kerektigin úıretpe, ózim bilemin» dedi.

Menmendikke salynǵan Mýsınov 2 mıllıonnan astam memleket qarjysyn jelge shashqan №1 qalalyq klınıkalyq aýrýhananyń basshysyn ósirip, odan da úlken emdeý mekemesine – №7 qalalyq aýrýhanaǵa bas dáriger etip taǵaıyndady.

Kórdińiz be, aýyshza shaǵym úshin bireý jumystan bosaıdy, al bireý búdjet qarjysyn ıgere almasa da ósip ketedi.

Osylaısha Mýsınov qarjy polısıasyn da pysqyrmaı, tipti Elbasynyń jemqorlyqpen kúresińder degen talabyn da oryndamady, – dep ashynady Berik Ádıev.

Negizi, el saýlyǵyna erekshe úles qosyp kele jatqan Damır Dáýletbaevtyń eńbegi eleýsiz qalǵan emes. Ol medısına ǵylymynyń doktory, profesor, «Altyn dáriger» medaline ıe bolǵan. Sonymen qatar ol Densaýlyq saqtaý salasyna qosqan súbeli úlesi úshin «QR Táýelsizdigine 10 jyl», «QR Táýelsizdigine 20 jyl» medaldarymen marapattalǵan.

Endi osyndaı bilikti kadrdy kereksinbeı kúresinge ıterip tastaýǵa bola ma?.. Emdeý mekemelerin basqaryp júrgen tájirıbeli mamandardy aýyzsha shaǵymǵa bola qatań sógis berip, jumystan bosata bersek, Almatyda jibi túzi bas dáriger qalmasy anyq.

Bir qyzyǵy, kelisi bir bas dáriger memleket qarjysyn shashyp,  eskertý alsa da qyzmette ósip jatqanyn kórip otyrmyz. Mýsınovtyń kadrdy baǵalaýdaǵy mundaı tásili Almatynyń densaýlyq saqtaý salasyn orǵa jyǵýy múmkin.

Endi bul jerde kimniń aq, kimniń qara ekenin ajyratyp alýdy patsha kóńildi oqyrmannyń ózine qaldyraıyq.

Serik Jumabaev, jýrnalıs