8 aqpan  kúni  Kremlde ótken  Reseı  men Qazaqstan  prezıdentteri  V.Pýtın men  N.Nazarbaevtyń   kezdesýinde el  basshylary  «Baıqońyrdyń máselesi  sheshildi»,− dep  málimdedi.    «Baıqońyr»   ǵarysh  aılaǵyn  paıdalanýda eki  tarapqa  da tıimdi  bolatyn bir   toqtamǵa  kelgenderin  aıtty.

Kezdesý  barysynda  eki  el  basshylary   2013-2015 jyldarǵa  arnalǵan  seriktestik  máselelerin talqylap,  Biryńǵaı ekonomıkalyq  keńistiktiń  qurylý  barysy  jáne   Eýrazıalyq  ekonomıkalyq  Odaqqa  ený  máselesin  sóz etti.  Sondaı-aq, eki  memleket  joǵarǵy deńgeıli  baılanysta  bolatyndaryn  aıta  kelip,   Baıqońyrdyń  jaıyna  aýysty.

Reseı  men  Qazaqstan  sarapshylary men  arnaıy  mekeme  jetekshileri   «Baıqońyr»  kosmodromyn   paıdalanýǵa qatysty  eki jaqty  mańyzdy  baılamdar  jasaǵandaryn,  nátıjesinde el  basshylary   eki  tarapty  da  qanaǵattandyratyn  sheshim  qabyldanǵandyǵyn  aıtty.  Alaıda  sheshimniń  qandaı  ekeni   týraly  naqty  málimetter  áli  shyqqan  joq.

Bir aıta  keteri,  Reseı  basshysy V.Pýtın  «Baıqońyrǵa»  qatysty   týyndaǵan  daýǵa  múldem  kóńil  bólmeıtinin  jetkizdi.

Esterińizge  sala  keteıik,  «Baıqońyr» ǵarysh aılaǵyn  kórshi  Reseı Federasıasy  2050 jylǵa  deıin jalǵa  alǵan  bolatyn.  Jaldaý  quny jylyna  5 mlrd.  rúbldiń  aınalasynda. Jaldaý  ýaqyty  kezinde  Baıqońyr aımaǵy RF quzyrynda  bolady  jáne  Baıqońyr  qalasynyń  federasıalyq quqyǵy  bar.

Alaıda ótken  jyldyń  jeltoqsanynda Baıqońyrdan shý  shyqqan-dy. Ulttyq Ǵarysh agenttiginiń  basshysy  Talǵat  Musabaev  parlamentte  málimdeme jasap,  Qazaqstan úkimeti Baıqońyr ǵarysh aılaǵynan reseılik «Proton-M» zymyran-tasyǵyshtaryn ushyrý sanyn azaıtýdy kózdep otyrǵanyn aıtyp, Reseıdi «Báıterek» zymyran ǵarysh keshenin qurý jaıly ýádesinen taıqydy dep aıyptaǵan. Baıqońyr ǵarysh aılaǵyna qatysty jańa kelisimniń daıyndalyp jatqanyn, budan bylaı Baıqońyr ǵarysh aılaǵy jáne Baıqońyr qalasy Qazaqstan bıligine ótetinin málim etken edi. Sondaı-aq,   Qazaqstan  jaǵy  2013 jylǵa  arnalǵan  ushý  josparyn  quptamaı,  "Proton-M" zymyrandarynyń  sanyn  qysqartqan bolatyn.  Osyǵan  baılanysty Reseı  tarapy  da jaldaý  qunyn  qysqartýdy  talap  etken.

Osydan biraz buryn  Reseıdiń  Syrtqy  ister mınıstri  S.Lavrovtyń  aıtýyna  qaraǵanda,  resmı Máskeý  «Proton-M»  zymyrandaryn  ushyrýdyń  sharty men  sanyn  talqylaýdyń   eshqandaı  qajeti  joq.  Jáne  ushyrý  sany  boıynsha  taraptar  arasynda  birinshi  ret kelispeýshilik  bolyp    otyrǵan  joq:  «Sondyqtan  mundaı  jaǵdaıda  shýlaıtyn  esh sebep  kórip turǵan  joqpyz,  Bul  tek  jumys  baby»,- dep  jaýap  bergen.  Sondaı-aq, qazaqstandyq sarapshy  Erlan Ydrysov ta  eshqandaı  kelispeýshiliktiń   joq ekenin  aıtyp,  «Qazaqstan  Baıqońyr  ǵarysh aılaǵyn  Reseımen  bólisýdi  toqtatpaq»   degen  kaýósetti joqqa  shyǵardy.

Sóıtip,  Baıqońyr  ǵarysh  aılaǵy  tóńireginde  biraz  daý-damaı   týyndaǵan.  Al  kúni  keshe  Kremlde  ótken  kezdesýde  qabyldanǵan  sheshim   Baıqońyrdyń  baǵyn  asha  ma,  álde  soryn  odan ármen  qaınata  ma, belgisiz...

Málimetter  http://www.odnako.org saıtynan