General Sabyr Rahymovtyń Tashkenttegi eskertkishi burynǵy ornyna qaıta qoıylatyn boldy. Bul týraly Ózbekstan Respýblıkasynyń prezıdenti Shavkat Mırzıóev Namangan oblysyna qarasty Naryn aýdanyndaǵy jıyn barysynda málimdedi.

Atalǵan jıynda kórshi eldiń Memleket basshysy eskertkishti ornyna qaıtarý tarıhı ádildik bolar edi degen pikirin bildirip ketti. Ári bul sharýany 9 mamyrǵa deıin bitirgen durys bolatynyn atap ótti.

Aıta keteıik, general Sabyr Rahymovtyń eskertkishi 2010 jyldyń sońyna deıin Tashkenttiń ortalyǵyndaǵy Almazar (burynǵy Sabyr Rahymov) aýdany ákimdigi ǵımaratynyń aldynda turǵan bolatyn. Keıin sol kezdegi prezıdent Islam Karımovtyń buıryǵymen qazaq generalyna ornatylǵan tas músin Ǵafýr Ǵulam atyndaǵy saıabaqqa kóshirilgen edi.

Aýdan atynyń ózgertilýi qoǵamdy túrli pikirtalas týyndatyp, kópshiliktiń talqysyna tústi. Ǵalymdar men aýdan ókilderi jergilikti turǵyndardyń ótinishi boıynsha tarıhı ataýdyń qaıta berilgeni durys degen pikir aıtqan bolatyn.

Aıta keteıik, Sabyr Rahymov 1902 jyly Ońtústik Qazaqstan oblysynyń Qazyǵurt aýdany, Kókibel aýylynda dúnıege kelgen. Ákesi erte qaıtys bolyp, jas qalǵan Rahymovty sheshesi (ózbek qyzy) Ózbekstanǵa alyp ketken. 1922 jyly sol jaqtan ásker qataryna shaqyrylǵan. Ekinshi dúnıejúzilik soǵys bastalǵanda polk, keıin dıvızıa qolbasshysy boldy.

1941 jyly shildede jaý qorshaýyn buzyp shyqqandaǵy batyldyǵy úshin 2-ret Qyzyl Tý ordenimen marapattalyp, polkovnık shenin aldy. Onyń dıvızıasy Dondaǵy Rostovta, Kavkazda urys júrgizdi. Belarýsty, Polshany azat etýge qatysty. Rahymov Lenın, 4 ret Qyzyl Tý, Qyzyl Juldyz, 2-dárejeli Sývorov ordenderimen, medaldarmen marapattalǵan. Tashkenttegi baýyrlastar zıratyna jerlengen general-maıor Keńes Odaǵynyń Batyry atanǵan.