Ońtústik Qazaqstan oblysynda sýǵa batyp bara jatqan 3 jasar búldirshindi órt sóndirýshi qutqaryp qalǵan bolatyn. Báıdibek aýdanyndaǵy № 10 órt sóndirý bóliminiń júrgizýshisin búgin óńirdiń TJD basshylyǵy marapattady.

Aıta keteıik, oqıǵa 20 sáýirde Báıdibek aýdanyndaǵy Jambyl aýylynda bolǵan edi. Kezekti eńbek demalysyna shyqqan aýdandyq órt sóndirý qyzmetkeri Erkinbek Berdibekov sol aýyldaǵy sharýa qojalyǵyna kómektesýge barǵan. Jumys istep jatyp ol Sasyq ózeni boıynda jylap júgirip bara jatqan kelinshekti kórip qalady. Sol sátte ol birden balanyń sýǵa ketkenin túsingen. Órt sóndirýshi oılanbastan ózenge sekirip, sýda aǵyp bara jatqan balany qutqaryp qaldy. Sýǵa tunshyǵyp qalǵan balany jaǵaǵa shyǵaryp, oǵan alǵashqy medısınalyq kómek kórsetken. Búldirshindi avtokóligimen aýyldaǵy emhanaǵa, keıinnen aýdandyq aýrýhanaǵa jetkizgen. Órt sóndirýshiniń osynaý erligi men dárigerlerdiń der kezinde kómek kórsetýiniń arqasynda 3 jasar Rahym esimdi bala aman qaldy.

Eske salaıyq, on jyldan astam órt sóndirý salasynda qyzmet atqaryp kele jatqan azamat buǵan deıin de aıazdy kúni baseın sýyna batqan jasóspirimdi qutqaryp qalǵan bolatyn. Qashanda adamdarǵa kómek kórsetýden aıanbaıtyn sóndirýshi birneshe marapattarǵa ıe bolǵan.