Ońtústik Qazaqstan oblysynda 2018 jyldyń qańtar-aqpan aıynda syrtqy saýda aınalymynyń kólemi 478,7 mln AQSH dollaryn quraǵan. Onyń ishinde eksport 224,8 mln AQSH dollarǵa jetip otyr.
Bul týraly oblys ákimi Janseıit Túımebaev selektorlyq rejımde ótken Úkimettiń otyrysynda málim etti.
Óz baıandamasynda aımaq basshysy bıylǵy jyly shetel naryǵyna shyǵarylǵan ónimderdiń ishinde 168 mln. AQSH dollary bolatyn taýar óńdeý ónerkásibiniń ónimi ekenin atap ótti.
«Qazaqstan Respýblıkasynyń Ulttyq eksporttyq strategıasy» baǵdarlamasyn iske asyrý jónindegi is-sharalar josparynyń 11 tarmaǵyn oryndaý maqsatynda eksporttyq áleýeti bar óndiristerdi qoldaý jáne óńirdegi kásiporyndardyń eksport kólemin arttyratyn tehnologıalardy engizý boıynsha is-sharalar jospary bekitilgen. Baǵdarlama eksporttyń áleýetin arttyrýǵa, qazaqstandyq taýar óndirýshilerdiń ónimin syrtqy naryqqa shyǵarýǵa qolaıly jaǵdaı jasaý, salaǵa baǵyttalǵan óndiristi damytýǵa múmkindik beredi», - dedi Janseıit Túımebaev.
Budan bólek, ákim eksporttyq áleýetti ulǵaıtý maqsatynda oblysqa Iran, Birikken Arab Ámirlikteri, Katar jáne Saýd Arabıasy memleketterine jaqyn ekendigin eskere otyryp, óńirdiń et ónimderin óńdeýshi kásiporyndaryn «Halal» standarty talaptaryna sáıkes akredıtteý, kedendik tosqaýyldardy joıý, eksporttalýshy tiri salmaqtaǵy jáne et ónimderin sapaly jetkizý úshin transporttyq ınfraqurylymdy jetildirý jumystary júrgiziletinin aıtty.
Jalpy Ońtústik Qazaqstan oblysynan eksportqa shyǵarylatyn ónimderdiń basym kópshiligi transformator, nasos, tyńaıtqysh jáne qurylys materıaldary, dári-dármek preparattary, kilem jáne kilem buıymdary, toqyma buıymdary, un, úndik eti men odan jasalǵan daıyn ónimder.
Sonymen qatar, oblys aýmaǵynda ornalasqan 11 ındýstrıalyq aımaqta 168,8 mlrd. teńgeni quraıtyn 171 joba júzege asyrylýda. Onda 10 myńnan astam jumys oryndaryn ashý josparlanýda.
Qazirgi tańda 171 jobanyń 75 jobasy iske qosylyp, 4 myńnan astam jumys orny qurylyp, bul jobalarǵa quny 43,4 mlrd. tg. ınvestısıa tartyldy. Atalǵan aımaqta 2017 jyly 5 joba 1900 tonna ónimdi 7,8 mlrd. teńgege eksporttaǵan.
