18 mamyr – Halyqaralyq mýzeı kúnine oraı Otyrar memlekettik arheologıalyq qoryq-mýzeıinde «Mýzeı – halyq qazynasy» atty tarıhı-tanymdyq merekelik shara ótti.

San ǵasyrlyq muralardyń kıeli ordasyna aınalǵan atalǵan mýzeı Elbasymyz N.Nazarbaevtyń «Bolashaqqa baǵdar: rýhanı jańǵyrý» maqalasyn júzege asyrý, Astananyń 20 jyldyǵy jáne kásibı merekege oraı «Mýzeı túni» atty keshki merekelik sharany  tuńǵysh ret uıymdastyrdy.

Kórermender úshin ashyqtyq jáne qol jetimdilik, ónerdi dáripteý jáne tanymal etý, jastardyń nazaryn aýdarý, umytylmas mereke uıymdastyrý maqsatynda ótkizilgen sharaǵa aýdan ákimi Aıtahanov Erlan Qýanyshuly qatysyp, barsha otyrarlyqtar men mýzeı qyzmetkerlerin aıtýly kúnmen quttyqtady.

«Otyrar - óziniń kóne tartpas  tarıhı qundylyqtarymen búkil álem ǵalymdarynyń, IýNESKO-nyń   nazaryn ózine aýdarǵan, ulttyń rýhanı altyn qazyǵy.  «Uly Otyrar – qazaq órkenıetiniń altyn dińgegi» dep Elbasymyz bekerge aıpasa kerek. Álemdik tarıhta óz orny bar Otyrardyń mártebesin kóterý jolynda eńbek etip jatqan Sizderdiń ujymdaryńyzdy tól merekelerińizben shyn júrekten quttyqtaımyn!» dep, izgi tilegin bildirgen aýdan basshysy E.Aıtahanov birqatar qyzmetkerlerge alǵys hat pen syı-sıapatyn tabys etti.

Merekelik sharada mýzeı kórermenderine «Tas dáýiri – Qarahan dáýiri» ekspozısıalyq bóliminde sol kezeńderdiń úlgisimen kıingen tanystyrýshylardyń áńgimeleri erekshe qaldyrsa, «Otyrar Mońǵoldardyń kezinde», «Qumyrashy», «Kıiz úı» bólimderinde qoıylǵan teatrlandyrylǵan kórinister kóne zamandy beıneledi. Al álem ustazy atanǵan Ábý Nasyr ál Farabı - tek otyrarlyqtardyń ǵana emes, kúlli túrki áleminiń, qala berdi musylman qaýymynyń maqtanyshy. Mýzeı túninde ǵulama babanyń týǵan jer týraly tolǵamy, ǵylym men bilim jaıly tolǵanystary tamashalaýshylardy aıryqsha tebirentti.

Sonymen qatar, «Qazaq halqynyń dástúrli mal sharýashylyǵy – Ulttyq kıimder», «Ańshylyq, saıatshylyq, balyq aýlaý» syndy birqatar tanystyrylymdar men mýzeı qyzmetkeri Nurseıit Ámzeniń tarıhqa baılanysty qoıǵan vıktorınalyq suraqtary rýhanıat álemin boıǵa tereń sińirýge áser etti.

Ǵasyrlar tereńinen syr tartqan ólke tarıhymen jete tanysýǵa shaqyrǵan «Mýzeı túni» mádenı sharasy aýyzasharǵa ulasty.