Mamyrdyń 17-sinen 18-ine qaraǵan túni Aqtóbede Levon Mırzoıan eskertkishi alynyp tastaldy. Aqtóbe qalasynyń bas sáýletshisi Tańat Shegebaev «ıdeologıalyq turǵydan eskirgen eskertkishtiń múldem joıylmaıtynyn, tek orny aýysqanyn» aıtady. Bul týraly Azattyq habarlady.

Bas sáýletshiniń aıtýynsha, tuńǵysh prezıdent atyndaǵy ortalyq saıabaqtyń bir buryshynda tarıhı zona jasalmaqshy. Ideologıalyq turǵydan eskirgen eskertkishter – Lenın, Frýnze, Mırzoıan eskertkishteri sol jerge aýystyrylady.

Eskertkish burynǵy Mırzoıan kóshesiniń boıynda 1997 jyldan beri turǵan.

Sovet úkimeti tusynda Qazaqstandy basqaryp, ashsa alaqanynda, jumsa judyryǵynda ustaǵan Mırzoıannyń eskertkishterin alyp tastap, Qazaqstan qalalaryndaǵy Mırzoıan atyndaǵy kóshelerdiń atyn aýystyrýdy qoǵam belsendileri birneshe jyldan beri talap etip keledi. Osyǵan oraı sáýirde Aqtóbedegi dál osy eskertkish turǵan Levon Mırzoıan kóshesiniń aty aýystyrylyp, Álıhan Bókeıhan esimi berilgen. 2015 jyly Astana qalasyndaǵy Levon Mırzoıan kóshesine Qanysh Sátbaevtyń aty berilgen. Al qoǵam belsendileri qansha shýlasqanymen nátıje shyqpaǵan Almaty qalasynda Mırzoıan atyndaǵy kóshe áli bar.