Qyzylorda qalasynda 16 mamyrda bastalǵan QR Eńbek sińirgen qaıratkeri, ánshi-kompozıtor Batyrhan Shókenov atyndaǵy "Otan-Ana" İİ respýblıkalyq oryndaýshylar baıqaýy aıaqtaldy, dep habarlaıdy Qamshy.kz aqparat agenttigi.
Bul shara Astana qalasynyń 20 jyldyǵy men Qyzylordanyń 200 jyldyǵyna tuspa-tus kelip otyr. Respýblıkalyq baıqaýǵa 18-30 jas aralyǵyndaǵy ánshiler ótinish jiberdi. Al qatysýshylardyń óner kórsetý rettiligi aldyn-ala jerebe tańdaý arqyly anyqtaldy. Baıqaýda ánshilerge mınýsovkada bek-vokaldy qoldanýǵa ruqsat etilmedi.
Bıyl án saıysyna elimizdiń barlyq qalalarynan jáne Ózbekstannan 25 oryndaýshy qatysyp, baǵyn synady.
Ónerpazdardyń talantyna QR Eńbek sińirgen qaıratkeri Erjan Ábdrahmanov, ánshi Dılnaz Ahmadıeva, kompozıtor Rınat Gaısın, Erkesh Shakeev, Batyrhan Shókenov atyndaǵy qordyń dırektory bolǵan Oljas Baıqanovtar baǵa berdi.
Baıqaý qorytyndysy boıynsha, bas júldeni Ońtústik Qazaqstan oblysynan kelgen Erik Tólenov aldy. Birinshi oryndy qaraǵandylyq Gúlnar Kóshenova, ekinshi oryndy Batys Qazaqstan oblysy atynan qatysqan Aıymbek Sartýkov jáne úshinshi oryndy qyzylordalyq Indıra Baıymbetova men astanalyq Kúláıim Qaıyrbaevalar ıelendi. Sonymen qatar, Shókenovter otbasynyń arnaıy júldesimen almatylyq Syrymtaı Eńsepov, qala ákiminiń arnaıy júldesimen aqtóbelik Nurtas Omarov jáne qyzylordalyq Turǵanáli Sharapov marapattaldy. Al Qyzylorda oblysynyń mádenıet, arhıvter jáne qujattama basqarmasynyń arnaıy júldesi Araılym Mahanbetjanovaǵa berildi.
18 mamyr – Batyrhan Shókenovtiń týǵan kúni. Osyǵan oraı ánshiniń týǵan jerinde onyń eskertkishi qoıyldy. Bul bastamany 2016 jyly oblystyq jastar saıasaty máseleleri basqaramasy kótergen bolatyn. Al 2017 jyly arnaıy oblystyq komısıa bul usynysty QR Mádenıet jáne sport mınıstrligine jiberdi. Eskertkishtiń eskızdik jobalaryn tańdaý oblystyq «Syr boıy» gazet basylymy men áleýmettik jeliler arqyly júrgizildi. Konkýrsqa jalpy sany 13 eskızdik joba kelip túsken. Solardyń arasynan 2017 jylǵy 7 sáýirdegi Memlekettik komısıanyń sheshimimen músinshi Murat Mansurovtyń jobasy úzdik dep tanyldy. Eskertkishtiń jalpy bıiktigi – 3,6 metr, al músinniń bıiktigi – 2,2 m (2N.V) qoladan jasalǵan, tuǵyrynyń bıiktigi – 1,6 m.
Sonymen qatar, konkýrsanttar Batyrhan Shókenov eskertkishiniń ashylýyna qatysyp, eskertkish mańyna tal ekti. Keshke Qyzylorda qalasynyń ortalyq alańynda konkýrs jeńimpazdary men qazaqstandyq estrada juldyzdarynyń qatysýymen Gala-konsert ótedi.
Baıqaýdy uıymdastyrǵan Qyzylorda oblysy mádenıet, arhıvter jáne qujattama basqarmasy jáne «Tańdaý» prodúserlik ortalyǵy.
Aıta keteıik, Batyrhan Shókenovti eske alýǵa arnalǵan «Otan Ana» konkýrsy bıyl ekinshi ret ótti. Al baıqaý tuńǵysh ret 2016 jyly uıymdastyrylǵan edi. Ol kezde baǵyn synaýǵa barlyǵy 200-den asa adam ótinish bildirip, onyń 26-sy iriktelip alynǵan bolatyn. Baıqaýǵa Qazaqstannyń halyq ártisi, memlekettik syılyqtyń laýeraty Roza Rymbaeva, kompozıtor-mýzykant, búkilodaqtyq estrada ártisteri konkýrsynyń laýreaty Iakov Han, kompozıtor, Qazaqstannyń eńbek sińirgen qaıratkeri Ramazan Taımanov, ánshi, Qazaqstannyń eńbek sińirgen qaıratkeri Mádına Sádýaqasova sekildi óner ıeleri qazylyq etti. Baıqaýdyń bas júldesin qaraǵandylyq Erbol Tájıev, al birinshi oryndy astanalyq Dáýren Orazbekov pen qaraǵandylyq Álibek Shákenov aldy. Baıqaýdyń ekinshi ornyn Batys Qazaqstan oblysynyń ónerpazy Sultan Qaıyrsapıev pen qyzylordalyq Erlan Baıbazarov ıelendi. Úshin oryn atyraýlyq Dınara Haırýllına men Shyǵys qazaqstandyq Janerke Qabataeva jáne Qyzylorda azamaty Darhan Qamataevtarǵa buıyrdy.
